Apple ընկերությունը հրաժարվել է Samsung-ի հետ iPad պլանշետների և MacBook-ների համար մարտկոցների արտադրության մեջ համագործակցությունից և իր պատվերները տեղափոխել է Amperex Technology Limited և Tianjin Lishen Battery արտադրողների գործարաններ։ Այս մասին տեղեկացնում է TechCrunch–ը՝ հղում կատարելով չինական China Business News հրատարակությանը:
Պատվերների տեղափոխումը կապված է Samsung SDI–ի կողմից Apple-ին մարտկոցների մատակարարումը դադարեցնելու հետ, որի պատճառը չի նշվում:
Samsung-ի և Apple-ի ներկայացուցիչներն առայժմ չեն մեկնաբանել այս տեղեկատվությունը:
Samsung-ը մինչ այժմ համարվում է Apple-ի համակարգիչների և բջջային հեռախոսների պահեստամասերի հիմնական մատակարարը: Հարավկորեական ընկերությունն Apple-ին էկրաններ, հիշողության մոդուլներ, պրոցեսորներ և այլ դետալներ է մատակարարում: Սակայն վերջին ամիսներին ԶԼՄ-ներում ոչ պաշտոնական տեղեկատվություններ են հայտնվում այն մասին, որ Apple-ը Samsung-ին փոխարինող է փնտրում: Մասնավորապես նշվում է ճապոնական Sharp-ի և հարավկորեական LG-ի հետ հնարավոր համագործակցության մասին: Այս տեղեկատվությունները հիմնականում հերքվել են Samsung-ի կողմից:
Apple-ի և Samsung-ի միջև հարաբերությունները սրվել էին այն բանից հետո, երբ Apple-ը Samsung-ին մեղադրեց իր տեխնոլոգիաների և շարժական սարքավորումների դիզայնի կրկնօրինակման մեջ: Առայժմ ամերիկյան ընկերությանը հաջողվում է իր իրավունքները պաշտպանել դատարանում. միայն այս տարվա օգոստոսին Samsung-ն անօրինական կրկնօրինակման համար 1,05 միլիարդ դոլար է վճարել Apple-ին:
