Արտահանման հետ կապված՝ Իրանում սահմանափակումների կիրառումից հետո ՀՀ կառավարությունը դիմել էր Իրանին՝ խնդրելով հաշվի առնել մեր բիզնեսի հետ կապված խնդիրները, և ՀՀ նկատմամբ առանձին վերաբերմունք ցուցաբերել ու վերսկսել պոլիմերային նյութերի մատակարարումները ՀՀ: Առայժմ պատասխան չկա, բայց ՀՀ պաշտոնյաներն ակնկալում են դրական զարգացումներ, ընդ որում՝ մոտ ապագայում: Նման հավաստիացում «Առաջին լրատվական»-ի հետ զրույցում արեց էկոնոմիկայի նախարար Տիգրան Դավթյանը:
Հարցին՝ եթե Իրանի հետ խնդիրները շարունակվեն, ՀՀ-ն միայն Վրաստանի՞ «հույսին» է լինելու բեռնափոխադրումերի առումով, նախարարը պատասխանեց, որ Վրաստանն ու Իրանը տրանսպորտային հոսքերի ճանապարհ են միայն: Նա չբացառեց, որ այլ երկրներից պոլիմերային նյութեր ներկրելու դեպքում թանկացում կլինի, բայց նշեց, որ որոշ արտադրանքներում հումքի մասնաբաժինը կա՛մ էական է, կա՛մ ոչ:
«Եթե նույնիսկ իրավիճակը ձգձվի, մեր տնտեսության վրա կշիռը շատ չի: Աշխարհը մեծ է և ներկրելու խնդիր չի լինի: Ցանկացած հումք, ցանկացած տեղից կարելի է մատակարարել: Միայն եվրոպան չէ, կա նաև Չինաստանը, որ գնային առումով շահավետ է: Ուղղակի ընկերությունները պետք է ջանքեր գործադրեն և չեմ բացառում, որ էժան տարբերակ կգտնվի: ՀՀ նման երկիրը պետք է բոլոր իրավիճակներում ունենա տարբեր ռեզերվային սցենարներ, որը մենք միշտ ունենք: Ցանկացած իրավիճակում, բարդ աշխարհաքաղաքական դիրքում ցանկացած տնտեսական իրավիճակում ունենք առնվազն 3 ելք»,- կիսակատակ ասաց Տ.Դավթյանը՝ շեշտելով, որ սա ամենաբարդ իրավիճակը չի:
