Լիբիայի պետական հեռուստատեսությունը այսօր առավոտյան հայտարարել է, որ միջազգային ուժերի ռմբակոծությունների հետևանքով ավելի քան 48 մարդ զոհվել է, մոտ 150 մարդ ստացել են տարբեր աստիճանի մարմնական վնասվածքներ: Ցուցադրվում են Լիբիայի հիվանդանոցները, որտեղ կան բազմաթիվ վիրավորներ, նշվում է, որ մեծ մասը Քադաֆիի կողմնակիցներ են: Այս մասին հաղորդում է Al-Jazeera-ն:
Սակայն շատերը նշում են, որ սա տեղեկատվական պատերազմի արդյունքներն են, իսկ զոհերի թիվն ու ցուցադրված կադրերը չեն համապատասխանում իրականությանը: Միսրատայում ականատեսները նշում են, որ Քադաֆիի կողմնակիցները ռմբակոծված ռազմական օբյեկտների մոտ են տեղափոխում ավելի վաղ զոհվածերի դիակներ` ներկայացնելով դրանց որպես նոր զոհեր: Այս մասին հաղորդում է BBC-ն:
Երեկոյան Al-Jazeera-ն տեղեկացրել է, որ իր 4 աշխատակիցները ձերբակալվել են: Նրանք Մավրիտանիայի, Թունիսի, Մեծ Բրիտանիայի և Նորվեգիայի քաղաքացիներ են: Հեռուստաընկերությունը հույս է հայտնել, որ նրանք անհապաղ ազատ կարձակվեն: Միացյալ Նահանգները կոչ են արել իր քաղաքացիներին զերծ մնալ Լիբիա այցելելուց, քանի որ ամերիկյան դիվանագիտական ներկայացուցչությունն այլևս չի գործում այդ երկրում, իսկ իրենց շահերը պաշտպանող մարմին Տրիպոլիում չկա:
Թուրքիան հայտարարել է, որ պատրաստ է անհրաժեշտ ներդրում կատարել` ապահովելու Լիբիայի օդային տարածքի անվտանգությունը: Այս մասին հաղորդել է Թուրքիայի արտաքին գործերի նախարարությունը` նշելով, Թուրքիան այս քայլին է գնում, քանի որ հանդիսանում է ՆԱՏՕ- անդամ: Այս մասին հաղորդում է Anadolu գործակալությունը:
Քիչ առաջ հայտնի դարձավ, որ Լիբիայի ռազմական օբյեկտները նոր ռմբակոծության են ենթարկվել: ԱՄՆ-ն օգտագործել է անտեսանելի «սթելզ» տեսակի ռազմական ուղղաթիռներ` 40 ռումբ նետելով ռազմավարական օբյեկտների վրա: Այս մասին հաղորդում է CBS հեռուստաալիքը: