Նոյեմբերի 21-ին Հալեպում կրակ էր բացվել Դար ալ-Շիֆա հիվանդանոցի` Հալեպի խոշորագույն բժշկական հաստատության վրա: Ինչպես ավելի ուշ պարզ դարձավ, Հալեպի հիվանդանոցին կառավարական օդուժի հասցրած հարվածի հետևանքով ամենաքիչը 40 մարդ էր զոհվել:
«Առաջին լրատվական»-ի հետ զրույցում Բերիո Հայոց թեմի առաջնորդարանի բանբեր Ժիրայր Ռայիսյանն ասաց, որ այս պահին տեղեկություններ չունի, թե հստակ քանի մարդ է տուժել հիվանդանոցին հասցված հարվածի հետևանքով:
«Միայն հստակ կարող եմ ասել, որ մենք՝ սիրիահայերս, ոչ մի առնչություն չունենք այդ դեպքի և հիվանդանոցի հետ»,- հստակեցրեց Ժիրայր Ռայիսյանը: Նա նշեց, որ Հալեպում այս օրերին իրավիճակն ընդհանրապես ավելի հանդարտ է, քաղաքում շատ միջադեպեր չեն գրանցվել:
Հիշեցնենք, որ ամիսներ առաջ ևս տեղեկություններ տարածվեցին, որ Հալեպի հիվանդանոցներից մեկը գնդակոծվել է, սակայն այն ժամանակ հնարավոր էր եղել խուսափել մեծաթիվ զոհերից:
