ՄԱԿ Անվտանգության խորհուրդը ողջունել է պաղեստինցի խմբավորումների և Իսրայելի միջև ձեռք բերված զինադադարի համաձայնագիրը և կողմերին կոչ է արել հետևել իրենց պարտավորվածություններին: Այս մասին հաղորդում է RIA Novosti-ն՝ վկայակոչելով ՄԱԿ ԱԽ-ի հայտարարությունը:
ՄԱԿ ԱԽ անդամները կողմերին կոչ են արել լուրջ գործողություններ ձեռնարկել պայմանավորվածության դրույթները կատարելու համար:
Փաստաթուղթը, սակայն, չի պահանջում Իսրայելից դադարեցնել Գազայի հատվածի շրջափակումը, ինչպես պնդում էին արաբական երկրները: Հայտարարության մեջ նշվում է, որ անհրաժեշտ է մուտք ապահովել Գազայի հատված և մարդասիրական օգնություն տրամադրել կարիքավորներին:
ՄԱԿ գլխավոր քարտողար Պան Գի Մունը, ելույթ ունենալով ՄԱԿ ԱԽ-ի նիստում, ևս ողջունել է Իսրայելի և պաղեստինյան խմբավորումների՝ զինադադար հաստատելու մասին որոշումը: «Ես շնորհակալ եմ կողմերին, որ նրանք մի կողմ քաշվեցին անդունդի եզրից»,- ասել է գլխավոր քարտուղարը:
Պան Գի Մունը ողջունել է նաև Եգիպտոսի ղեկավարության միջնորդական ջանքերը Իսրայելի և ՀԱՄԱՍ-ի միջև բանակցություններում: «Իսրայելի և Գազայի ժողովուրդների, միջազգային հանրության համար մեծ թեթևություն է, որ բռնությունը դադարեցվել է»,- ընդգծել է Պան Գի Մունը:
Հիշեցնենք, որ նոյեմբերի 21-ի երեկոյան Եգիպտոսի արտգործնախարար Մուհամմադ Ամրը ԱՄՆ-ի պետքարտուղար Հիլարի Քլինթոնի ներկայությամբ հայտարարել էր, որ Իսրայելը և Գազայի հատվածում իշխող ՀԱՄԱՍ շարժումը համաձայնության են եկել զինադադար հաստատելու շուրջ: Զինադադարն ուժի մեջ մտավ նույն օրը՝ տեղի ժամանակով ժամը 21:00-ին:
Իսրայելի օդուժը նոյեմբերի 14-ից ռազմական գործողություններ էր սկսել Գազայի հատվածում ՀԱՄԱՍ շարժման գրոհայինների դեմ: Գազայի առողջապահության նախարարության տվյլաներով՝ այս ընթացքում զոհվել է 162 պաղեստինցի, այդ թվում՝ 42 երեխա, 11 կին, 18 տարեց մարդ: Վիրավորների թիվը հասնում է շուրջ 1222-ի, այդ թվում՝ 433 երեխա և ավելի քան 200 կին:
