ԱԺ աշխատանքներին, այդ թվում` երեկ արտահերթ նիստից, Գագիկ Ծառուկյանի բացակայությունը ԲՀԿ կուսակցությունից մշտապես նրա պատճառաբանում են նրա գերզբաղվածությամբ կամ արտերկրում լինելով: «Առավոտ»-ը գրում է, որ երեկ Ծառուկյանի մամուլի խոսնակ Իվետա Տոնոյանը նշել է. «Գագիկ Ծառուկյանն այսօր պարզապես չի կարողացել ներկա գտնվել Աժ արտահերթ նիստին մի պարզ պատճառով, որ նույն ժամին կուսակցության կենտրոնական գրասենյակում շատ կարևոր ու նախօրոք պլանավորված հանդիպումներ է ունեցել` կապված ընդհանուր քաղաքական գործընթացների հետ»: Մինչդեռ ԲՀԿ պաշտոնական կայքում տեղադրված նյութից երեկ հայտնի դարձավ, որ որոշվել է բռնցքամարտի երիտասարդական հավաքականի կազմը, իսկ ահա Հայաստանի ազգային օլիմպիական կոմիտեի նախագահ Գ. Ծառուկյանը ներկա է գտնվել սպարինգ մենամարտին (կայքի համար հղումը տեղադրել` http://www.bhk.am/index.
php?al = news&id = 1246&act = more&type = 11):
Քաղաքական ուժերի միջև ընթանում են կոնսուլտացիաներ, բանակցություններ, ավելին` քաղաքական ուժերը նախագահական առաջիկա ընտրություններից առաջ բարձրացնում են համախմբման, նույնիսկ միասնական թեկնածու ունենալու անհրաժեշտության հարց, իսկ ԲՀԿ-ական պատգամավորները և մասնավորապես ԲՀԿ առաջնորդը չի մասնակցում կարևորագույն քաղաքական իրադարձությանը` միաժամանակ ներկա է գտնվում բռնցքամարտի երիտասարդական հավաքականի կազմի որոշմանը և բռնցքամարտիկների սպարինգ մենամարտին:
Մի՞թե իրական բռնցքամարտը Գագիկ Ծառուկյանի համար այս օրերին ավելի կարևոր է, քան քաղաքական «բռնցքամարտը»: Իսկ գուցե «այլընտրանք» հանդիսացող քաղաքական ուժի համար քաղաքական իրական «բռնցքամարտ» գոյություն չունի՞…
ՀԱԿ-ից հաճախ են հնչում կարծիքներ, թե ԲՀԿ-ն քայլ առ քայլ ցույց է տալիս, որ այլևս կաշկանդված չէ, որոշ քայլերով դեռ ցույց է տալիս, որ կաշկանդված է… Այնուամենայնիվ, անհասկանալի է, թե ինչու է «այլընտրանք» հանդիսացող քաղաքական ուժի առաջնորդը խուսափում խորհրդարանական գործունեությունից, այն էլ` այս շրջանում, երբ հայաստանյան քաղաքական թիվ մեկ ինտրիգը համարվում է նրա առաջադրվել-չառաջադրվելու հարցը: Մի՞թե երեկ խորհրդարանում ծավալվող գործընթացները պատեհ առիթ չէին ընդդիմության հետ բանակցող քաղաքական հիմնական ուժի առաջնորդի համար` ի ցույց դնելու «կաշկանդվածության» բացակայությունը, առավել ևս, որ երեկ Գ. Ծառուկյանը Zham. am-ին տված «բացառիկ» հարցազրույցում նշել էր, որ իր մեջ որոշումն արդեն իսկ կայացրել է…
