Իրանական ընդդիմության առաջնորդներ Մեհդի Քյարուբին եւ Միր Հոսեյն Մուսավին դատապարտել են երկրի հոգեւոր առաջնորդ Ալի Խամենեիի հայտարարությունը: Այս մասին հաղորդում է ադրբեջանական Trend լրատվական գործակալությունը:
Դատապարտման հայտարարությունը տեղադրված է Իրանում արգելված Ազգային վստահության կուսակցության պաշտոնական կայքում: Կուսակցության ղեկավարը Մեհդի Քյարուբին է:
Հոկտեմբերի 26-ին Ղոմ քաղաք կատարած այցելության ժամանակ Խամենեին հայտարարել է, որ որոշ մարդիկ, հեռանալով Իրանի իսլամական հեղափոխությունից, ծառայում են հակահեղափոխականների շահերին: Ըստ Խամենեիի` ընդդիմության առաջնորդները, որոնք չեն ճանաչում անցած տարի կայացած նախագահական ընտրությունների արդյունքները, մարդիկ են, որոնք հոգ են տանում միայն պաշտոն ստանալու մասին` համեմատելով նրանց «մանրէների» հետ:
Հիշեցնենք, որ անցած տարվա հունիսին կայացած նախագահական ընտրություններից հետո, երբ հաղթող էր ճանաչվել ներկայիս նախագահ Մահմուդ Ահմադինեժադը, ընդդիմության ներկայացուցիչները դրանք կեղծված համարեցին: Բողոքի ակցիաների ժամանակ մի քանի տասնյակ մարդ զոհվեց, բազմաթիվ մարդիկ ձերբակալվեցին, իսկ «անկարգություններ» հրահրողներին դատապարտեցին մահապատժի: