Bad Sex in Fiction Award 2012-ի ժյուրին հայտարարել է սեքսի ամենավառ նկարագրության հաղթողների հավակնորդների անունները: Ինչպես գրում է The Guardian-ը, ի հեճուկս ակնկալիքների` եզրափակչում չեն հայտնվել Ջոան Ռոուլինգի «Ազատ վայրը» և Է. Լ. Ջեյմսի «Մոխրագույնի 50 երանգները» գրքերը:
Ժյուրիի խոսքով՝ Ռոուլինգի գրքի շուրջ քննարկումները բուռն են եղել, սակայն ի վերջո փորձագետները եկել են այն եզրակացության, որ չնայած մի քանի սրտխառնոց առաջացնող պահերի` վեպը չի համապատասխանում մրցանակի չափանիշներին:
«Մոխրագույնի 50 երանգները» ժյուրին բացառել է՝ այն համարելով բացահայտ պոռնոգրաֆիա: Ըստ Literary Review-ի չափանիշների՝ մրցանակը չի շնորհվում էրոտիկ վեպերի:
Բրիտանական Literary Review ամսագրի մրցանակի շորթ-լիստում ներառվել է 8 ստեղծագործություն, մասնավորապես դրան հավակնում է ամերիկյան գրականության դասական Թոմ Վուլֆը, որն արդեն հակամրցանակի դափնեկիր է. 2004-ին նա Bad Sex in Fiction Award էր ստացել «Ես Շառլոտա Սիմոնսն եմ» վեպի համար: Այս անգամ մրցանակի հավակնում է Վուլֆի «Հետ դեպի արյունը» (Back to Blood) ստեղծագործությունը: Մրցանակը տրվում է կոպիտ, անճաշակ, երբեմն սեքսուալ տեսարանների անհարկի օգտագործման համար:
Bad Sex in Fiction Award-2012-ի հաղթողի անունը հայտնի կդառնա դեկտեմբերի 4-ին: Անցյալ տարի այդ մրցանակին արժանացել է ամերիկացի Դևիդ Հաթերսենը «Արքա Էդ» վեպի համար
