ԱՄՆ-ն տարակարծիք է իր գլխավոր դաշնակից Թուրքիայի հետ՝ կապված Գազայում իսրայելի ուժային գործողությունների հետ: Դրա հետ մեկտեղ Վաշինգտոնը մեղադրել է Անկարային հակամարտությունը սրող հռետորաբանության համար, որը չի նպաստում լարվածության թուլացմանը պաղեստինաիսրայելական հակամարտությունում:
Այսօր ելույթ ունենալով ամենօրյա բրիֆինգի ժամանակ՝ պետդեպարտամենտի մամլո ծառայության ղեկավար Վիկտորիա Նուլանդը հաղորդել է, որ ամերիկյան կառավարությունը արդեն տեղեկացրել է թուրքական կողմին բոլոր դժգոհությունների մասին՝ կապված Իսրայելի դեմ Անկարայի կտրուկ արտահայտությունների հետ՝ հաղորդում են համացանցային լրատվամիջոցները:
Վաշինգտոնի խիստ դժգոհությունն են առաջացրել Թուրքիայի վարչապետ Ռեջեփ Թայիփ Էրդողանի խոսքերը:
Հիշեցնենք, որ նախօրեին Եվրասիական իսլամական ֆորումի ժամանակ Էրդողանը հայտարարել է, որ Իսրայելը ահաբեկչական պետություն է և նրա կողմից Գազայում իրականացվող օպերացիան ահաբեկչական ակտ է: Դրա հետ մեկտեղ նա ընդգծել է, որ չի վստահում ՄԱԿ-ին՝ «այդ կազմակերպության անգործության պատճառով»:
