Դեկտեմբերի 9-ին գյուղապետ են ընտրելու Գեղարքունիքի մարզի Երանոս գյուղում: 2003 թվականից գյուղը ղեկավարող Գագիկ Խանսանամյանը հրաժարական է տվել: Գեղարքունիքի մարզպետարանից «Հրապարակ»-ը տեղեկացավ, որ վերջին անգամ նա ընտրվել է 2010 թվականի հունվարի 8-ին, հրաժարական տվել 2012-ի հոկտեմբերին 18-ին, որն ընդունել է նոյեմբերի 1-ին: 2009-ից հանրապետական է: Այսօր արդեն 54-ը բոլորած Գագիկ Խանսանամյանը, ըստ երանոսցիների, գյուղում հարգանք ուներ, բարի համբավ էր վայելում, դրական գործեր ունի արած: Գագիկ Խանսանամյանի պաշտոնապես հրապարակված կենսագրականի համաձայն, նա ամբողջ 23 տարի, բանակից վերադառնալուց հետո` 1980-2003-ի հատվածում, Ռուսաստանի Դաշնության տարբեր մարզերում զբաղվել է գործարարությամբ և ձեռներեցությամբ: Վերադարձել է Երանոս ու գյուղապետ ընտրվել:
Թերթի տեղեկություններով, Գագիկ Խանսանամյանի հրաժարականը քաղաքական որևէ պատճառ չունի: Լուրեր են շրջում, որ արտագնա աշխատանքների ժամանակ նրա մտերիմ ընկերներից մեկը, թե եղբայրը «դրսում լավ գործ է դրել» ու Խանսանամյանին կանչում է միասին աշխատելու: Առաջարկն այնքան գրավիչ է, որ Խանսանամյանը հրաժարվել է գյուղապետի պաշտոնից:
Երանոսն արտագնա աշխատանքների մեկնողների թվով թերևս միանձնյա առաջատարն է Հայաստանում: Մարդիկ նկատում են, որ հատկապես ամռանն այս գյուղում տղամարդ չի մնում` միայն տարեցներ, կանայք, երեխաներ: Հիմա էլ, փաստորեն, գյուղապետն է մեկնում: Իսկ Երանոսի գյուղապետի աթոռի համար պայքարում են գյուղապետի օգնական, հանրապետական Ապետնակ Մովսեսյանն ու անկուսակցական Վարդան Վարդանյանը:
