2014 թվականից ուժի մեջ կմտնեն հարկային նոր փոփոխությունները, որոնք շուտով կքննարկվեն ԱԺ-ում: Այդ փոփոխություններով նախատեսվում է ներդնել շրջանառության հարկ՝ մինչև 58 մլն դրամ շրջանառություն ունեցող ձեռնարկությունների համար, խթանել աշխատատեղերի ստեղծումը՝ հաջորդ 3 տարիներին նվազեցնելով շահութահարկը, և դադարեցնել շահութահարկի գանձման օրենսդրական նորմը:
«Առաջին լրատվական»-ի հետ զրույցում Հայաստանի գործատուների հանրապետական միության նախագահ Գագիկ Մակարյանն այս երեք կետերին երկու ձեռքով կողմ արտահայտվեց, սակայն, ըստ նրա, բարեփոխումները հատկապես միկրո և փոքր բիզնեսի դաշտում պետք է շատ զգուշավոր անել և տիրապետել այն խնդիրներին, որոնցով տառապում է փոքր բիզնեսը: 2008-ից մինչ օրս տնտեսվարողների թիվը մոտ 123 հզ. 750-ից հասել է 172 հզ.–ի, բայց մինչև հիմա էլ ձեռնարկությունների 50 %–ը եղել է թղթի վրա, չգործող, և դրա մեջ գերակշռող մասը եղել է միկրո և փոքր բիզնեսը:
ՀՀ-ում ձեռնարկությունների մեծ մասը փոքր բիզնեսն է, և նաև այդ պատճառով, է, որ հարկային բեռի մեծ մասը նրա վրա է ընկնում: Միաժամանակ, Գ. Մակարյանի բնորոշմամբ, կարծես «ջուրը արմատներին չի հասնում», ռեֆորմների արդյունքը չի երևում, և այդ կատեգորիայի տնտեսվարողները միշտ տուժում են:
Գ. Մակարյանը կարևորեց աշխատատեղեր ստեղծելու համար արտոնություն տալը, որովհետև ՀՀ-ում 470 հզ. մարդ է աշխատում պետական մասնավոր հատվածում՝ առանց գյուղական զբաղվածության: Այս 470 հզ-ը բազմապատկած 300 դոլարով (ՀՀ-ում միջին աշխատավարձ), և 12-ով՝ 1.8 մլրդ–ի էլ չի հասնում, որից շատ՝ 2 մլրդ ստանում ենք որպես տրանսֆերտ: Այսինքն՝ մեր տնտեսության ակտիվության աստիճանը 50 %-ից ավելի պայմանավորված է դրսից եկող գումարներով, իսկ դա շատ ռիսկային իրավիճակ է: Ըստ Մակարյանի՝ կա խնդիր՝ կա՛մ աշխատատեղեր ստեղծել, կա՛մ աշխատավարձերը բարձրացնել: Աշխատատեղեր ստեղծել չի ստացվում, որովհետև մոնոպոլիայի պատճառով փոքր ու միկրո բիզնեսները տուժում են ու շարքից դուրս գալիս, իսկ ձեռնարկությունների արտադրողականությունը, շահութաբերությունը ցածր է, և աշխատավարձ բարձրացնել չեն կարող:
«Այս բալանսը պետք է փոխել՝ խթանել աշխատատեղերի ստեղծումը: Կարևոր է նաև հավաար մրցակցությունը: Սննդի անվտանգության տեսչությունը պանրի ոլորտում տուգանեց տնտեսվարողներին, քաոտիկ վիճակ է՝ մի խումբ են գտնում՝ տուգանում, հետո մյուս խումբը։ Բայց տուգանելով ոչինչ չի փոխվում, տնտեսվարողների կրթվածության մակարդակը մնում է ցածր»- ասաց Գ.Մակարյանը՝ նշելով, որ այսօր կրթական համակարգերը, օրինակ՝ միջին կրթական հաստատությունները, եվրոպական չափանիշներ չեն ընդգրկում, մնացել են հին համակարգում, ու դա տեղափոխվում է արդյունաբերություն:
Նա կարևորեց գործարարների իրազեկումը միությունների կողմից, որոնց հետո կազմակերպությունների երկխոսությունն ավելի անկեղծ է լինում. «Մարդիկ պետք է հավատան, որ այս երկրում իրենց գործարարությամբ զբաղվելն ունի հեռանկար։ Կառավարության կեցվածքը միայն դրական է, ոչ թե մի օր լավացնի, մի օր վատացնի, և հավասար մրցակցություն չլինի: Նաև շատ կարևոր է գնումների համակարգը, որ խթանվի տեղական արտադրողը»: