Մեծ Բրիտանիայի թագուհի Էլիզաբեթ 2-րդը այսօր դարձել է բրիտանական պատմության մեջ առաջին միապետը, որը տոնում է սեփական ամուսնության 65-րդ տարեդարձը:
Ակնկալվում է, որ ընտանեկան տոնը միապետն ու նրա ամուսինը՝ Էդինբուրգի հերցոգ, արքայազն Ֆիլիպը, կտոնեն մտերիմների շրջապատում:
«Դա ուղենիշ է, որին դեռ չի հասել ոչ մի բրիտանացի միապետ, և որը կարող է մնալ անգերազանցելի»,- նշում են տեսաբանները:
Արքայադուստր Էլիզաբեթը 13 տարեկան էր, երբ հանդիպեց Հունաստանի ու Դանիայի արքայազն Ֆիլիպին: Այն ժամանակ Ֆիլիպը ծովային կադետ էր: Նրան հանձնարարված էր ուղեկցել Գեորգ 6-րդի դստերը` Դորտմուտի ծովային քոլեջ այցերի ժամանակ:
Այդ ժամանակ իր ապագա հարսնացուի հետ Ֆիլիպը կրոկետ է խաղացել: Ավելի ուշ` պատերազմի տարիներին, նրանք սկսել են նամակներ փոխանակել: Զույգն ամուսնացել է 1947թ. նոյեմբերի 20-ին` Վեսթմինստրի աբբայությունում:
Էլիզաբեթի հարսանեկան զգեստի հեղինակը Նորման Հարթնելն էր:
Հարսանիքի օրը զույգը ստացավ ընդհանուր առմամբ 2,5 հազար նվեր`Մեծ Բրիտանիայից և համագործակցության երկրներից` հաղորդում է ITAR-TASS-ը:
