Էստոնիայում օրինագիծ է մշակվել, որը քրեական պատասխանատվություն է սահմանում տեղահանությունների, ցեղասպանության և մարդկության դեմ այլ հանցանքների հերքման համար: Նման հանցագործություններ հերքելու համար, համաձայն փաստաթղթի, մինչև երեք տարվա ազատազրկում է սպասվում։ Այս մասին հաղորդում է DELFI-ն:
Օրինագիծը պատրաստվել է արդարադատության նախարարության կողմից: Համաձայն փաստաթղթի՝ նման հանցագործությունները հերքելը կամ անէական ճանաչելը պատժելի են այն դեպքում, «եթե հերքումն ուղեկցվում է խտրականության, բռնության կամ ատելության կոչերով»։
Ինչպես նշել են նախարարությունում, օրինագիծը կկիրառվի միայն այն արտահայտությունների դեպքում, որոնք վերաբերում են մարդկության դեմ հանցագործություններին, որոնք հաստատվել են միջազգային կամ էստոնական դատարանի որոշմամբ:
Թե երբ խորհրդարանը կքննարկի փաստաթուղթը, պարզ չէ:
1940-ական թվականներին Էստոնիայում տեղի են ունեցել զանգվածային տեղահանություններ, որոնց զոհ են դարձել հազարավոր մարդիկ:
