Համաշխարհային բանկային ստվերային համակարգը աճել է 6 տրիլիոն դոլարով և կազմել 67 տրիլիոն դոլար, ինչն էլ ստիպում է համաշխարհային կարգավորողներին ավելի ուշադիր հետևել ֆինանսական գործողություններին։ Այս մասին գրում է Businessweek-ը:
Բանկային ստվերային համակարգի չափերը, որը ներառում է դրամական շուկայի ուղղվածություն ունեցող ֆոնդերի գործունեությունը, նեղ մասնագիտացում ունեցող ապահովագրողներին և բալանսից դուրս ներդրումային համակարգերին, «կարող է համակարգային ռիսկեր առաջացնել»,– ասվում է Ֆինանսական կայունության բյուրոյի զեկույցում:
Ըստ զեկույցի՝ մոնիթորինգը և ստվերային բանկային համակարգի նորմատիվային բազան պետք է համապատասխանեցվեն, որպեսզի մեղմեն ռիսկերի աճը։ Կարգավորողներն անհանգստացած են, որ պարտատերերը կարող են օգտագործել բանկային ստվերային համակարգը, որպեսզի խուսափեն ճնշումներից և սահմանափակումներից:
Կարգավորողներից և կենտրոնական բանկերից բաղկացած բյուրոյի տվյալները ցույց են տալիս, որ ստվերային բանկային համակարգը 2002- 2011 թվականներին աճել է 41 տրիլիոն դոլարով:
Բյուրոն անհանգստացած է նաև նրանով, որ կարգավորող մարմիններն ի վիճակի չեն հետևել գործարքների մասշտաբին։ Ըստ բյուրոյի՝ խոշոր ընկերությունները պետք է ավելի շատ տեղեկություններ տրամադրեն ներդրողների հետ կնքած գործարքների մասին։
Վերջնական կանոնները կներկայացվեն Սանկտ Պետերբուրգում հաջորդ տարի կայանալիք G20-ի գագաթնաժողովին:
