Բնապահպաններն ու ատոմային էներգետիկայի հակառակորդները նոյեմբերի 18–ին արգելափակել են «Գրոնդե» ԱԷԿ-ը։ Այս մասին գրում է գերմանական Spiegel թերթը:
Նրանք փորձել են կանխել այնտեղ խառը օքսիդային վառելիքի տեղափոխումը, որը պարունակում է պլուտոնիում: Ոստիկանությունը ցուցարարների մի քանի խմբի հեռացրել է Նորդենհամից, ուր ժամանել էր վառելիքով բեռնված Atlantic Osprey նավը: Ոստիկանության ներկայացուցիչը հայտնել է, որ 3 մարդ ձերբակալվել է:
Ցույցի կազմակերպիչների տեղեկություններով՝ ակցիային մասնակցել է, ընդհանուր առմամբ, շուրջ 150 մարդ: Որոշ մասնակիցներ փչովի նավակներով ջուրն են իջել, իսկ մի քանիսն անգամ թռել են ջուրը:
Չնայած այդ ակցիաներին՝ ոստիկանությանը հաջողվել է միջուկային վառելիքով բեռը տեղափոխել ԱԷԿ:
