Սանկտ Պետերբուրգում Հայաստանի 55-ամյա քաղաքացին կասկածվում է թմրանյութերի տարածման մեջ:
Ինչպես հաղորդում է տեղի Rosbalt գործակալությունը՝ վկայակոչելով իրավապահ մարմիններին, Սանկտ-Պետերբուրգի ծաղկի խանութներից մեկում առգրավվել է հաշիշի խոշոր խմբաքանակ՝ 55 կգ թմրանյութ: Թմրանյութը քաղաք է բերվել ծաղկի մեծածախ խմբաքանակի անվան տակ:
Հաշիշը հայտնաբերվել է Շտուրմանսկի փողոցի 32-րդ բնակարանում, որտեղ տեղակայված է եղել խանութ-պահեստը: Թմրանյութի մատակարարումները Պետերբուրգ կազմակերպել է Հայաստանի Հանրապետության 55-ամյա մի բնակիչ, որի անունը չի հաղորդվում:
Օպերատիվ-հետախուզական ծառայության աշխատակիցները պարզել են հանցավոր խմբի բոլոր անդամների ինքնությունը: Նշվում է, որ Հայաստանի քաղաքացին հենց խմբի պարագլուխն է:
Փաստի առիթով հարուցվել է քրեական գործ ՌԴ ՔՕ 30 և 228.1 հոդվածներով (թմրամիջոցների ապօրինի վաճառքի նախապատրաստում):
Ներկայում քննիչները փորձում են պարզել հաշիշի տարածման բոլոր խողովակները:
