Անդրադառնալով այն հանգամանքին, թե ինչքանով էին միմյանց հետ կապված ԵԽԽՎ մոնիտորինգի հանձնաժողովի համազեկուցողներ Ջոն Պրեսկոտի և Ակսել Ֆիշերի ներկայությունը Հայաստանում և երեկվա հանրահավաքի ընթացքում ոստիկանության լավ պահվածքը, ՀՀԿ-ական պատգամավոր Արտակ Դավթյանը նշեց, որ եթե փորձենք տրամաբանական կապեր տեսնել, ապա դա ամեն ինչի մեջ էլ հնարավոր է տեսնել:
Դավթյանի գնահատմամբ, այնտեղ, որտեղ խախտումներ չկան, ոստիկանությունն էլ տեսանելի չէ, իսկ երեկվա հանրահավաքը, ըստ Դավթյանի, շատ կազմակերպված էր, և որևէ խախտում չարձանագրվեց:
ՀՀ նախկին արտգործնախարար Ալեքսանդր Արզումանյանն էլ արձագանքելով՝ ասաց. «Եթե պրեսկոտները գան և գրանցվեն Երևանում, ապա ոստիկանությունը միշտ անտեսանելի կլինի»:
Արզումանյանի գնահատմամբ, ոստիկանության երեկվա պահվածքն իրոք զարմանալի էր. «Մեր ոստիկանությունը, որը միշտ իրեն լկտի է պահել, հայտնի է իր լկտի հրամանատարներով, որոնք կանանց են հայհոյում, թքում վրաները` չամաչելով ոստիկանի իրենց համազգեստից, երեկ շատ սիրալիր էին, և դա, այո, տարօրինակ է»:
Ըստ Արզումանյանի, մեր ոստիկանները իրենց եվրոպական ձևով են պահել միայն այն ժամանակ, երբ Հայաստանում են եղել միջազգային կառույցների ներկայացուցիչները: Նա հիշեցրեց, որ ոստիկանությունն իրեն երեկվա պես չափազանց սիրալիր էր պահում Մարդու իրավունքների միջազգային ֆեդերացիայի՝ Հայաստանում անցկացված համաժողովի ժամանակ ընթացքող հանրահավաքին: