ԱՄՆ-ի իշխանությունները մեղադրանք են ներկայացրել BP բրիտանական նավթագազային ընկերության երեք աշխատակիցների դեմ 2010 թ. Մեքսիկական ծոցում վթարի հետաքննության նոր փուլի շրջանակներում: ITAR-TASS-ի փոխանցմամբ` այս մասին հայտարարել է ԱՄՆ-ի արդարադատության նախարար Էրիկ Հոլդերը:
BP ընկերության ներկայացուցիչներ Ռոբերտ Կալուզեին և Դոնալդ Վիդրայնին , ովքեր վթարի օրը գտնվել են Deepwater Horizon հարթակում, մեղադրանք է ներկայացվել 23 կետով, ներառյալ 11 մարդու կանխամտածված սպանություն և ջրային ռեսուրսների մաքրության մասին դաշնային օրենքի խախտում: Բացի այդ մեղադրանք է ներկայացվել Մեքսիկական ծոցում նավթի արդյունահնման հարցերով այդ ժամանակահատվածում ընկերության փոխնախագահի պաշտոնը զբաղեցրած Դևիդ Ռեյնի դեմ: Նա մեղադրվում Կոնգերսին և իրավապահ մարմիններին սուտ վկայություն տալու մեջ:
Հինգշաբթի հայտնի էր դարձել, որ BP ընկերությունը համաձայնության է եկել ԱՄՆ-ի արդարադատության նախարարության հետ և մեղավոր է ճանաչել իրեն 14 կետերով, որոնք վերաբերում են Deepwater Horizon նավթահարթակում նավթի արտահոսքի և վթարի հետևանքով աշխատակիցների մահվան պատճառներին: Մեղքը ճանաչելու և 4.5 միլիարդ դոլարի տուգանք մուծելու դիմաց ԱՄՆ-ի արդարադատության նախարարությունը համաձայնել էր հրաժարվել ընկերության հետագա դատական հետապնդումից:
Հոլդերը BP-ի հետ ձեռք բերված պայմանավորվածությունն անվանել է պատմական, սակայն ընդգծել է, որ դաշնային կառավարությունը շարունակելու է հետաքննել վթարի պատճառները:
Հիշեցնենք, որ Մեքսիկական ծոցում Deepwater Horizon նավթային հարթակի պայթյունը տեղի էր ունեցել 2010 թ. ապրիլի 20-ին։ Վթարի հետևանքով Մեքսիկական ծոց էր արտահոսել 5 մլն բարել նավթ։ Այս միջադեպն ԱՄՆ պատմության մեջ խոշորագույն բնապահպանական աղետն էր: