Նոյեմբերի 14-ի երեկոյան ՄԱԿ ԱԽ-ը արտահերթ նիստ է անցկացրել՝ նվիրված Գազայի հատվածի վրա Իսրայելի ռազմա-օդային ուժերի կողմից իրականացված օդային հարվածներին: Ինչպես Reuters գործակալությանը հաղորդել է ՄԱԿ-ում Հնդկաստանի դեսպան Սինգխ Պուրին, մեկուկես ժամ տևած նիստի ընթացքում որևէ հայտարարություն չի ընդունվել:
Դեսպանը հույս է հայտնել, որ ՄԱԿ ԱԽ-ի արտահերթ նիստի անցկացման փաստը կօգնի թուլացնել Մերձավոր Արևելքում աճող լարվածությունը:
ՄԱԿ ԱԽ անդամների առջև ելույթ ունեցած Պաղեստինի ինքնավարության ներկայացուցիչներն առաջարկել են կոչ անել Իսրայելին դադարեցնել ռազմական գործողությունները Գազայի հատվածում, սակայն չի հաջողվել համաձայնեցնել այս հայտարարության տեքստը:
ՄԱԿ գլխավոր քարտուղար Պան Գի Մունը ԱԽ արտահերթ նիստից առաջ լրագրողներին հայտարարել է, որ հեռախոսազրույց է ունեցել Իսրայելի վարչապետ Բենիամին Նեթանյահուի և Եգիպտոսի նախագահ Մուհամմադ Մուրսիի հետ: Նեթանյահուի հետ զրույցի ժամանակ Պան Գի Մունն իր անհանգստությունն է արտահայտել իրավիճակի վատթարացման կապակցությամբ: Իսկ Եգիպտոսի նախագահ Մուհամմեդ Մուրսիին հիշեցրել է, որ անհրաժեշտ է խուսափել իրավիճակի հետագա վատթարացումից:
