Ֆիննական Nokia Corp.-ն սմարթֆոնների համաշխարհային շուկայում 3-րդ եռամսյակում իջել է 7-րդ տեղը, դրա հետ մեկտեղ, բջջային հեռախոսների համաշխարհային վաճառքը մի փոքր նվազել է անցյալ տարվա նույն ժամանակահատվածի համեմատ։ Չորեքշաբթի այս մասին հայտնել է Gartner Inc. հետազոտական ֆիրման,- փոխանցում է asiareport-ը:
Բջջային հեռախոսների վաճառքը սպառողներին 3-րդ եռամսյակում նվազել է 3,1%-ով՝ անցյալ տարվա նույն ժամանակահատվածի համեմատ, սակայն սմարթֆոնների ավելի առաջատար բաժնում համաշխարհային վաճառքը մեծացել է 46,9%-ով,- հայտնել է Gartner-ը:
Gartner-ի տվյալներով` Apple Inc-ն ու Samsung Electronics Co.-ն 3-րդ եռամսյակում առաջատար են սմարթֆոնների բաժնում` ընդհանուր շուկայական 46,5% բաժնով:
Nokia-ն հատկապես անհաջող եռամսյակ է ունեցել սմարթֆոնների վաճառքով և իջել 7-րդ տեղը` վաճառելով ընդամենը 7,2 մլն սարք,- հայտնում է Gartner-ը:
«Windows 8 հիմքով Lumia սարքերի թողարկումը պետք է օգնի կանգնեցնել շուկայական անկումը 2012-ի 4-րդ եռամսյակում»,- նշել է հետազոտական ընկերությունը` ավելացնելով, որ Nokia-ի դիրքերը դժվար թե կտրուկ լավանան մինչև 2013-ը: Բջջային հեռախոսների ավելի լայն շուկայում Nokia-ի բաժինը 23,9%-ից ընկել է մինչև 19,2%:
Samsung-ը զբաղեցրել է առաջին տեղը բջջային հեռախոսների շուկայում, նրա շուկայական բաժինը 18,7%-ից ավելացել է մինչև 22,9%` անցյալ տարվա նույն ժամանակահատվածի համեմատ:
Apple-ը երրորդն է դարձել` 3,9%-ից 5,5%: Չնայած բջջային հեռախոսների համաշխարհային վաճառքի ծավալների անկմանը 3-րդ եռամսյակում 2011-ի նույն ժամանակահատվածի համեմատ` շուկան բարելավվել է նախորդ եռամսյակների համաեմատ,- նշել է Gartner-ը:
«2 եռամսյակ շարունակ բջջային հեռախոսների վաճառքի անկումից հետո պահանջարկն ավելացել է և՛ զարգացած, և՛ զարգացող երկրներում»,- մեկնաբանել է ընկերությունը:
