Նոր կառավարությունը մատակարարող ընկերությունների հետ 24 նոր պայմանագրեր է կնքել, որոնց մեծ մասը վերաբերում է «Մեքենաների և սարքավորումների ընթացիկ նորոգմանն ու պահպանմանը» (9 պայմանագիր) և «Գրասենյակային նյութերի և հագուստի» ձեռքբերմանը (8 պայմանագիր): Ամենածախսատար պայմանագրերը, սակայն, վերաբերում են ծառայողական մեքենաների համար բենզինի ձեռքբերմանը («Տրանսպորտային նյութեր» բաժնով):
Այսպես, ապրիլի 28-ին կնքվել են 2 պայմանագրեր, որոնցով ձեռք է բերվել 60 հազար լիտր «պրեմիում» տեսակի բենզին և 9 հազար լիտր «ռեգուլյար» տեսակի բենզին` ընդհանուր առմամբ 31 միլիոն 236 հազար դրամ (մոտ 75.5 հազար դոլար) գումարով: Նախկինում` փետրվարին, արդեն 32.6 միլիոն դրամ գումարի բենզին և դիզվառելիք ձեռք բերվել էր:
Ընդհանուր առմամբ այս տարվա պետական բյուջեով «Տրասնպորտային նյութեր» բաժնի համար նախատեսված է 175 միլիոն դրամ կամ ավելի քան 420 հազար դոլար: Մեր նախորդ հոդվածներից մեկում, անդրադարձել էինք կառավարության աշխատակազմի` 100% մաշվածություն չունեցող ծառայողական մեքենաներին, որոնց թիվը 52 էր: Եթե տրանսպորտային նյութերի (հիմնականում` բենզինի) համար նախատեսված 175 միլիոն դրամը բաժանենք 52-ի, կստանանք 3 միլիոն 365 հազար դրամ: Այսինքն` ճիշտ այդքան գումարի վառելիք է օգտագործում կառավարության աշխատակազմի ծառայողական 1 մեքենան (միջինում): Դա էլ աշխատանքային 1 օրվա կտրվածքով ստացվում է միջինում 14 հազար դրամ:
Ինչ վերաբերում է «Մեքենաների և սարքավորումների ընթացիկ նորոգմանն ու պահպանմանը», ապա կնքված 9 նոր պայմանագրերի ընդհանուր արժեքը կազմել է ավելի քան 1 միլիոն դրամ: Այս տողով կառավարության աշխատակազմի համար 2014թ. բյուջեով նախատեսված է 16 միլիոն դրամ: Ուշագրավ է, որ մեքենաների և սարքավորումների նորոգման վրա 16 անգամ շատ գումար է ծախսվում, քան շենքերի և կառույցների ընթացիկ նորոգման և պահպանման: Ինչևէ, մեքենաների նորոգման համար նախատեսված 16 միլիոն դրամը 52 ծառայողական մեքենայի դեպքում կազմում է ամսական 26 հազար դրամ: Այսինքն` կառավարության 1 ծառայողական մեքենան միջինում ամսական 26 հազար դրամի սպասարկման գումար է ենթադրում:
Բավականին հետաքրքիր ու անտրամաբանական են կառավարության աշխատակազմի հեռախոսային ծախսերը: Կապի ծառայությունների համար նոր կառավարությունը 2 նոր պայմանագրեր է կնքել` 418 հազար դրամի, իսկ այս բաժնով նախատեսված ծախսերը այս տարվա համար կազմում են 168.5 միլիոն դրամ` ավելի շատ, քան էներգետիկ ծառայությունները (150.8 միլիոն դրամ): Այսինքն` կառավարության աշխատակազմը աշխատանքային 1 օրում մոտ 700 հազար դրամի հեռախոսային ծախեր է կատարում, ինչը չափազանց մեծ թիվ է: Թե ինչու է կառավարությունը ավելի շատ հեռախոսի փող տալիս, քան էլեկտրաէներգիայի (տրամաբանական պետք է լիներ հակառակը), մինչև վերջ պարզ չէ: Խնդիրը կարծում ենք, նրանում է, որ կառավարության աշխատակիցները չարաշահում են ֆիքսված հեռախոսակապից բջջային համարներին կատարվող զանգերը և կառավարությունը չի օգտվում միջազգային հեռախոսակապ ապահովելու ժամանակակից տեխնոլոգիաներից, որոնք շատ ավելի էժան են նստում:
Կառավարության մեկ այլ խոշոր ծախս է «այլ ծախսեր» բաժնով գնացող գումարը, որը 2014-ի համար 50 միլիոն դրամ է (մոտ 200 հազար դրամ` մեկ աշխատանքային օրվա համար): Այս բաժնով ծախսված գումարների կոնկրետ տվյալները չեն երևում բյուջեում: