Եվրոպայի հայկական միությունների ֆորումը (ԵՀՄՖ) մոտ երկու ամիս առաջ նախաձեռնել էր մի ծրագիր, որ եվրոպական ֆինանսական կազմակերպությունների միջոցով Հայաստանում գործարարության աջակցման նպատակով ցածր տոկոսադրույքներով վարկեր տրամադրի: ԵՀՄՖ նախագահ Աշոտ Գրիգորյանն «Առաջին լրատվական»-ի հետ զրույցում հայտնեց, որ արդեն մի քանի կոնկրետ ծրագրեր են դիտարկում, որոնցից 2-ը մինչև տարեվերջ կամ հաջորդ տարվա սկզբին հաստատապես կիրականացվեն, և կտրամադրվեն էժան վարկեր. «Ջերմուկ Գրուպ» ընկերությանը նախատեսվում է տրամադրել մոտ 4 մլն եվրո՝ նոր հոսքագծի համար, և 5 մլն եվրո կհատկացվի Արմավիրի մարզի գյուղացիներին՝ սլովակյան արտադրության 100-120 տրակտորներ ձեռք բերելու համար: Մյուս վարկառուների ծրագրերը դեռ քննարկվում են: Վարկերը տրվելու են տարեկան 4.2-4.5 % տոկոսադրույքով (եվրոպական բանկերից վերցված գումարի տոկոսադրույքն է), 6.5 տարով, որից 1.5-2 տարին արտոնյալ կլինի:
«Փորձում ենք այնպես անել, որ էժան վարկերը չթանկանան»,- ասաց Ա. Գրիգորյանը՝ նշելով, որ նախ Կենտրոնական բանկն էր 1 % թանկացնում վարկը, քանի որ այն դրսից եկող էր, բայց ԿԲ–ի հետ պայմանավորվածություն է ձեռք բերվել, որ այդ տոկոսադրույքը չի գործելու ԵՀՄՖ վարկերի համար, նաև բանկերի հետ են աշխատում, որ նրանք իրենց ծառայության համար 2 %-ից ավելի չպահանջեն, և արդյունքում եվրոպական վարկերը հայ գործարարներին հասնեն գոնե 6.5 %-ով, որը հիանալի կլինի:
Ա. Գրիգորյանի խոսքերով՝ բանկերը դժվարությամբ են համաձայնում տոկոսդրույքը ցածր պահել, ինչը գուցե սեփական թանկ վարկերի գինը չգցելու համար է, կամ էլ անտեղյակությունից է, որովհետև եղել է, որ տնօրենը ուրախությամբ ընդունել է առաջարկը, իսկ բանկի առանձին բաժնում խոչընդոտներ են ստեղծվել:
Նա տեղեկացրեց, որ տրակտորներ ձեռք բերելու դեպքում վարկառուն պետք է լինի համայնքը՝ ամենայն հավանականությամբ մարզպետարանը, ոչ թե առանձին գյուղացին: Յուրաքանչյուր տրակտորն արժի 20-25 հզ. եվրո, բայց վարկի համար գրավ չի պահանջվելու, որովհետև տրակտորն ինքն արդեն գրավի առարկա է, և մարզպետարանն էլ համարվում է վստահելի գործընկեր ու երաշխիք՝ վարկի վերադարձելիության առումով: ՀՀ-ում հիմնվելու է նաև տրակտորների սպասարկման կենտրոն: «Այս տրակտորները գնում են նաև ռուսաստանցիները, թեև ՌԴ-ն հենց տրակտոր արտադրող երկիր է: Ու թեև այս տրակտորներն ավելի թանկ են, քան ռուսականը, սակայն սրանք ավելի երկարակյաց են ու էկոնոմ»,- ասաց Ա. Գրիգորյանը:
ԵՀՄՖ նախագահի խոսքերով՝ իրենք վերահսկելու են, թե ինչպես են մարզպետարանները բաժանելու տրակտորները։ Նա բացառեց խտրականության հնարավորությունը: Սակայն, ըստ նրա, այս տրակտորները չեն կարողանա ձեռք բերել գյուղացիական մանր տնտեսությունները, այլ կտրվի խոշորներին, որովհետև տրակտորների արդյունավետությունը փոքր հողակտորների վրա ցածր է. «Փոքր տնտեսությունը չի կարող մեծ տրակտոր վերցնել, իսկ փոքրն էլ չի կարող չոր հողը անհրաժեշտ ձևով մշակել: Փոքր տնտեսությունները պետք է միավորվեն և պարտադիր պետք է խոշորացում գնա: Եվ արդյունքում սա չտեսնված օգնություն կլինի գյուղացիների համար, ոչ թե կառավարության տված բարձր տոկոսներով վարկերը, որ գյուղացիները չեն կարողանում վերադարձնել»:
Նշենք, որ եվրոպական առևտրային բանկերը ապահովագրվում են Սլովակիայի պետական բանկի կողմից: Հայկական ընկերությունը ևս պետք է ունենա հայկական որևէ առաջնակարգ բանկի երաշխիք:
