ԱԺ ՀԱԿ խմբակցության պատգամավոր Նիկոլ Փաշինյանը հունիսի 9-ին Տրանսպորտի և կապի փոխնախարար Արթուր Առաքելյանից հետաքրքրվեց. նախկինում այս ոլորտում ատկատների մասին շատ էր խոսվում, արդյո՞ք հիմա մարդիկ համոզված են, որ ատկատներ չպիտի տան, և եթե համոզված են, ապա ինչի հաշվին, քանի որ վերջին տարիներին չեն տեսել ինչ-որ քայլեր, որոնք և լայն հանրությանը պիտի համոզեին, որ այս դաշտում կոռուպցիոն ռիսկեր չունեն:
«Չեն եղել փաստեր, որ մեզ կտան փաստարկներ, որ ատկատների մեխանիզմն արմատախիլ է արված, հակառակը՝ հանրային կարծիքի ոլորտում խորը համոզմունք կա, որ դրանք ինչպես եղել են, այնպես էլ կան»,- ասաց նա:
Առաքելյանը նշեց, որ Ասիական զարգացման բանկի կողմից ՀՀ-ին արտոնյալ վարկ է տրվել և որևէ պարտավճար դրա մասհանման կամ մասհանման ուշացման համար նախատեսված չէ, այսինքն՝ վնասի փոխհատուցում ուշ մասհանման համար չի եղել: «Ես նշեցի, որ սա նոր ծրագիր էր, և կարողություն զարգացնելու խնդիր կար, սակայն հետագա տրանշները վստահ ենք մտնում, ու այլևս Եվրոպական ներդրումային բանկից ներգրավվող գումարն էդ մասով արտոնյալ չէ. եթե ուշացնենք մասհանումները, համապատասխան բանկը վարկային միջոցները պիտի ճիշտ պլանավորի, մենք այսինքն կփոխհատուցենք, սակայն հետագա խնդիրներ չենք ունենա՝ այլևս գիտենք ինչ ենք անում»,- ասաց նա:
Առաքելյանը վստահեցրեց՝ իրենք կկարողանան դեկտեմբեր ամսին Արտաշատ – Աշտարակ հատվածն ավարտել: Ատկատներին անդրադառնալով՝ նա նշեց, որ ռիսկերը մեղմելու համար գործում են բավական թափանցիկ, շուտով այս ծրագրի շրջաբնակներում նոր մրցույթներ կհայտարարվեն:
