ԱԺ ՀՀԿ խմբակցության պատգամավոր Շիրակ Թորոսյանը Տրանսպորտի և կապի փոխնախարար Արթուր Առաքելյանին դիմելով՝ նշեց, որ թեպետ «Հյուսիս-Հարավ» ճանապարհային միջանցքի շինարարությունը բարձր է գնահատում, քանի որ այն Հայաստանի ողնաշարն է դառնալու, սակայն հետաքրքրվեց՝ այդ տրանշները՝ տեղամասերը, ի՞նչ առաջնահերթությամբ են ընտրվում, և ինչու՞ առաջին ու երկրորդ տրանշները եղան Արտաշատ – Երևան և Երևան – Աշտարակ ճանապարհահատվածները, որոնք համեմատության մեջ ամենաբարվոքն էին, մինչդեռ Գյումրի – Բավրա ճանապարհահատվածը, որ ամենավատ վիճակում է, որտեղ ամեն տարի փոս է լցվում, լրացուցիչ ծախսեր են կատարվում, առաջնահերթներից չէր: «Կարելի էր այդտեղից սկսել, այն ստրատեգիական ճանապարհ է, նաև՝ մեր հայրենակիցների՝ դեպի Ջավախք ելքումուտքի խնդիրն է լուծում»,- ասաց նա:
Առաքելյանը նշեց, որ երբ ծրագիրը հաստատվոմ էր, Ասիական բանկի խորհրդատուների առաջարկությամբ՝ ուսումնասիրությունների հիման վրա, ցավոք, չունեինք զարգացած կարողություններ՝ այս պրոցեսներն առաջին օրվանից կառուցելու համար: Նա համաձայնեց պատգամավորի մտահոգությանը, բայց նշեց, որ այս տարիների ընթացքում իրենք ձեռք են բերել բավարար փորձ, որ վստահ անցնեն հետագա տրանշերին: Փոխնախարարը տեղեկացրեց, որ մինչև Վրաստանի սահմանն իրենք շուտով նորություններով հանդես կգան, նախատեսվում է նաև հարավային մասերում սկսել շինարարությունը: «Ձեր դիտողությունն արդեն քննարկվում է, որ ժամանակավոր լուծում գտնենք՝ առանց մեծ, կապիտալ ներդրումների, ճանապարհը բերենք բարվոք վիճակի»,- ասաց նա:
Թորոսյանը տեղից արձագանքեց, որ կարելի էր մի տրանշով փորձ ձեռք բերել, հետո անցնել նպատակահարմար հատվածների, և ստիպված չէին լինի ժամանակավոր լուծումներով հավելյալ ծախսեր կատարել, մարդիկ էլ խորխորատների միջով չէին ուղևորվի:
