Իսպանիայում ձերբակալվել է 66-ամյա բասկ կին ահաբեկիչը՝ Մարիա Խեսուս Էլորսա Սուբիսարետան, ով մեղադրվում է 1980-ականներին իսպանական իրավապահ մարմինների մի քանի ներկայացուցիչների սպանության մեջ: Այս մասին գրում է ITAR-TASS-ը՝ վկայակոչելով Թագավորության ՆԳՆ-ին:
Բասկյան ԷՏԱ ահաբեկչական կազմակերպության անդամ Սուբիսարետան 1984-ին գտնվել է ընդհատակում: 1980-ականներին նա տեղափոխվել է Ֆրանսիա, որտեղ պատասխանատու է եղել այդ երկրում ԷՏԱ-ի գրոհայինների հետ կապերի համար: 1996-ին նրան հաջողվել է Վենեսուելա տեղափոխվել: Սակայն սույն թվականի հունիսի 8-ին Էլորսան դեռևս անհայտ պատճառներով որոշել է վերադառնալ հայրենիք: Նա ձերբակալվել է մայրաքաղաքի «Բարախաս» օդանավակայանում:
