Իսրայելի և Պաղեստինի նախագահներ Շիմոն Պերեսը և Մահմուդ Աբասը կիրակի օրը երեկոյան Վատիկանում հանդիպելիս գրկախառնվել են: Նրանց առանձին-առանձին ընդունել է Հռոմի պապը: Այնուհետև երկու առաջնորդները պապի և Կոնստանտինոպոլսի պատրիարքի հետ նույն միկրոավտոբուսով ուղևորվել են Վատիկանի այգիներում գտնվող էկումենիկ աղոթատեղի, փոխանցում է ITAR-TASS-ը:
Այնտեղ սկսված արարողության ժամանակ ռաբբիները՝ Տորայից, կաթոլիկ քահանաները՝ Նոր Կտակարանից, իսկ իմամները՝ Ղուրանից հատվածներ կկարդան: Երկու պատվիրակությունների կազմում էլ ներառված են եղել ազգային և կրոնական փոքրամասնությունների ներկայացուցիչներ:
Այս ակցիայի անցկացման մասին հայտարարվել էր Սուրբ Երկիր պապի այցելության ժամանակ: Ինչպես հաղորդում է Սուրբ գահի մամլո ծառայությունը՝ պապը սկզբում ցանկացել է այս հանդիպումը Երուսաղեմում անցկացնել, սակայն երկու կողմերը չեն համաձայնել:
Ավելի վաղ Աբասը Հռոմում հայտարարել էր, որ հենց Պերեսի հետ է 1993թ. ստորագրել Օսլոյի համաձայնագիրը, սակայն «ներկայումս այս փաստաթուղթը Իսրայելի իշխանության մեջ հակառակորդներ ունի»:
Կողմերի լարված հարաբերությունների պայմաններում Պերեսի Վատիկան այցելությունը մինչև վերջին պահը հստակեցված չէր, սակայն այն ամեն դեպքում հաստատել են:
Փորձագետները նշում են, որ այս՝ արդեն պատմական դարձած հանդիպման ժամանակ քաղաքական որոշումներ չեն կայացվի, սակայն, հնարավոր է՝ այն խթանի խաղաղ գործընթացը:
