Microsoft-ի հիմնադիր Բիլ Գեյթսը վաճառել է բրիտանական G4S պահնորդային ընկերությունում իրեն պատկանող բոլոր բաժնետոմսերը, որը ներքաշված էր մի շարք սկանդալների մեջ՝ հաղորդում է Reuters գործակալությունը:
Գնորդի անունը հայտնի չէ: G4S-ը հրաժարվել է մեկնաբանել տեղի ունեցածը:
Անցած տարվա հունիսին հայտնի էր դարձել, որ Bill & Melinda Gates Foundation բարեգործական կազմակերպությունը ներկայացնող Cascade Investment ընկերությունը ձեռք է բերել բրիտանական պահնորդային ընկերության բաժնետոմսերի ավելի քան 3%-ը:
G4S-ը մասնագիտանում է գանձման, բանտերի պահնորդության և տարաբնույթ միջոցառումների պաշտպանության ոլորտում: Վերջին տարիներին ընկերությունը խառնված է եղել մի քանի սկանդալային պատմությունների: 2012 թ. ընկերության համբավին մեծ վնաս հասցրեց Լոնդոնի Օլիմպիական խաղերի անհաջողությունը, քանի որ ընկերությունը չկարողացավ խոստացված թվով պահնորդներ տրամադրել:
Ըստ G4S-ի կայքում առկա պաշտոնական տեղեկությունների՝ ընկերությունը գործում է ավելի քան 120 երկրներում և ունի շուրջ 618 հազար աշխատակիցներ:
