Մխչյանցիները, շրթունքները կծոտելով ու ժպիտը թաքցնելով, հաստատում են վարչապետ Հովիկ Աբրահամյանի այն պնդումը, թե ինքը հողագործությամբ է հարստացել: Երբ մենք վարչապետի ծննդավայր Մխչյան գյուղում փորձեցինք փոքրիկ հարցախույզ անցկացնել վարչապետի հայտնի հայտարարության հետքերով, շատ քչերը ցանկացան տեսախցիկի առաջ խոսել: Շատերը, տեսնելով տեսախցիկը, վազում էին տուն և փակում դռները: Ոմանք էլ դեռ հեռվից ձեռքը թափահարելով՝ կիսասպառնալից պահանջում էին իրենց չնկարել: Իսկ լավագույն դեպքում՝ «Ես ոչ մի բան չգիտեմ, ինձ ոչ մի բան մի հարցրեք», կամ՝ «Ես տեղացի չեմ» պատասխանը կար ու կար:
Ամեն դեպքում, մենք երկու մխչյանցի գտանք, ովքեր թեև խուսափելով, բայց մի քանի վայրկյան խոսեցին տեսախցիկի առաջ: Նրանք նույն՝ վերը նկարագրված ձևով հաստատեցին, որ Հովիկ Աբրահամյանը հողի հետ մեծ սեր ուներ: «Այո, զբաղվել ա հողագործությամբ, հետո տենց գնացել ա: Ամեն ինչ էլ արել ա, զբաղվել ա, աշխատել ա»,- ասաց գյուղացիներից մեկը: Մեր մյուս հարցերին գյուղացիները նույն ստանդարտ պատասխաններն էին տալիս. «Մենք հավատում ենք Հովիկ Աբրահամյանին»։
