Հյուսիսային Ամերիկայում շոկոլադային արտադրանքի խոշորագույն արտադրող Hershey ընկերությունը դատի է տվել Կոլորադոյում գործող մի ֆիրմայի, որն արտադրում է մարիխուանայով կոնֆետներ ու բատոններ։ Ինչպես հաղորդում է Associated Press-ը, ապրանքանիշի խախտման մասին հայցի առիթ է հանդիսացել այն, որ TinctureBelle և TinctureBelle Marijuanka քաղցրավենիքների չորս տեսակներ չափազանց նման են Hershey-ի արտադրանքին։
Մարիխուանայով կոնֆետները Կոլորադոյում վաճառվում են հատուկ վաճառակետերում ու դեղատներում։ Hershey-ը համարում է, որ TinctureBelle քաղցրավենիքների նման փաթեթավորումը կարող է մոլորության մեջ գցել գնորդներին, այդ թվում՝ նաև երեխաներին։ Այդ կապակցությամբ Hershey-ը դատարանից խնդրում է «նմանակված» քաղցրավենիքների վաճառքի դադարեցում, ինչպես նաև պահանջում է վնասի հատուցում, որի չափը չի ճշտվում։
Կոլորադոյում օրենսդիրներն այժմ փորձում են դիտարկել ներկայում սովորական կոնֆետների կամ կեքսերի հետ հեշտությամբ շփոթվող՝ մարիխուանայով արտադրանքի տարբերանշաններին վերաբերող կանոնների խստացման հարցը։
