«Առաջարկը եղել է հրապարակային»,- երեկ «Առավոտի» հետ զրույցում ասաց «Ազատ դեմոկրատներ» կուսակցության ղեկավար Խաչատուր Քոքոբելյանը` պատասխանելով հարցին` պատրաստվո՞ւմ են, արդյոք, ընդունել ԲՀԿ-ի առաջարկները և քաղաքական կոնսովտացիաների փուլ մտնել: Հիշեցնենք, որ ԲՀԿ խմբակցության քարտուղար Նաիրա Զոհրաբյանն ասել էր, որ խորհրդարանական բոլոր ուժերի, այդ թվում նաև «Ազատ դեմոկրատների» հետ են բանակցելու: Առաջարկը հնչեցնելու պահին խորհրդարանում կուսակցության ներկայացուցիչներ Խաչատուր Քոբոբելյանը և Ալեքսանդր Արզումանյանը բացակայում էին Հայաստանից: Նրանք վերադարձել են նախօրեին: Իսկ ԲՀԿ-ն արդեն իսկ առաջին փակ հանդիպումներն է անցկացրել ՀՅԴ-ի, ՀԱԿ-ի և «Ժառանգության» հետ:
Քոքոբելյանը նկատեց, որ 100 տոկոսանոց համամասնական ընտրակարգին անցումն իրենց ծրագրային դրույթներից է, և կուսակցությունում այն սկզբունքային են համարում: Ինչ վերաբեում է խորհրդարանական համակարգին անցնելու առաջարկին. «Ինքս գտնում եմ, որ դրանով ԲՀԿ-ն զուտ քաղաքական տեխնոլոգիա է կիրառում: Դա իր իրավունքն է: Այն ԲՀԿ-ի շուրջ համախմբման ենթատեքստ ունի: Եվ որ քաղաքական ուժերի ներկայացուցիչները խոսում են այն մասին, թե անձերը կարևոր չեն, ես գտնում եմ, որ անձերն էլ շատ կարևոր են: Միայն ծրագիրը չէ, որ պետք է կարևորել: Միշտ կարելի է այնպիսի պլատֆորմ ներկայացնել, որը բոլորի համար ընդունելի կլինի, ու շատ կարևոր է, թե ինչպիսի անձերով են առաջնորդվելու, իրագործելու այդ ծրագիրը»:
Վերջնական որոշումներ «Ազատ դեմոկրատները» դեռ չունի: Դրանք կկայացվեն այսօր կայանալիք կուսակցության վարչության նիստում, որտեղ կքննարկվեն Հայաստանի նախընտրական իրավիճակին վերաբերող տարբեր հարցեր, այդ թվում նաև ԲՀԿ-ի առաջարկն ընդունել-չընդունելու հարցը: Կհստակեցվի առաջիկա նախագահական ընտրություններին կուսակցության մասնակցության ձևաչափը:
«Առավոտի» դիտարկմանը` երեկ տված հարցազրույցում ՀՀ երկրորդ նախագահ Ռոբերտ Քոչարյանը կարծես «մեսիջ» էր հղել քաղաքական ուժերին` ԲՀԿ-ի շուրջ համախմբվելու, Խաչատուր Քոբոբելյանը պատասխանեց. «Անկեղծ ասած, ես նման «մեսիջ» չտեսա: Այլ «մեսիջ» տեսա` ինքը փորձում է ներկայացնել, որ այս պահին ինքը ԲՀԿ-ի հետ անտեսանելի թելերով կապված չէ»: Ինչ մնում է Ռոբերտ Քոչարյանի` 100 տոկոսանոց համամասնական ընտրակարգի մասին դիտարկումներին, Քոբոբելյանն ասաց. «Ժամանակին իրենք այդ հնարավորություններն ունեցել էին, և եթե այդքան ցանկություն ունեին 100 տոկոսանոց ընտրակարգի անցնելու, իրենց հնարավորությունը կարող էին օգտագործել»: «Հայաստանում մեծամասնական ընտրակարգը նպաստում է տարածքների ֆեոդալականացման գործընթացին՝ ընտրատարածքների սահմաններում, ընդ որում` իշխանությունը կամա թե ակամա աջակցում է դրան, քանի որ միտված է վերարտադրման: Երևույթը չափազանց վնասակար է, և որքան շուտ դրանից հրաժարվենք, այնքան լավ: Իմիջիայլոց, հենց այդ պատճառով մեծամասնական պատգամավորների թիվը մեզանում բազմիցս կրճատվեց: Ափսոսում եմ, որ ես չավարտեցի այդ գործընթացը: Ինչո՞ւ չավարտեցի: Հասարակ պատճառով. իշխանությունն ուզում էր «ֆորա» ունենալ միամանդատ ընտրատարածքներով»,- ասել էր Ռոբերտ Քոչարյանը:
Թերթի հարցին` ի՞նչ եք կարծում, ո՞ւմ կամ ո՞ր քաղաքական ուժի հասցեին է մեղադրանքներ հնչեցնում Քոչարյանը, Խաչատուր Քոքոբելյանն ասաց. «Ես ցանկություն չունեմ մեկնաբանելու Ռոբերտ Քոչարյանին»: