Ամերիկյան հատուկ ծառայությունների նախկին գործակալ Էդվարդ Սնոուդենի մոտ ԱՄՆ հետախուզության գործունեության վերաբերյալ ավելի քիչ գաղտնի փաստաթղթեր կան, քան համարվում էր ավելի վաղ: Այնուամենայնիվ, նրա գործունեությունից վնասը, ինչպես նախկինում, բարձր է գնահատվում՝ գրում է Washington Post-ը՝ հղում անելով ԱՄՆ Ազգային հետախուզության տնօրեն Ջեյմս Կլեպերին:
«Մենք նախկինի պես հետաքննում ենք (Սնոուդենի գործողությունները), բայց կարծում ենք, որ շատ բան այն ամենից, ինչին նա ծանոթացել է, չի կարողացել իր ձեռքի տակ ունենալ: Ըստ ամենայնի, նրա ձեռքի տակ չկան որոշ բաներ, որոնք մենք կարծում էինք, թե նա վերցրել է»,- պարբերականին տված հարցազրույցում ասել է Կլեպերը:
Ավելի վաղ CBS հեռուստաալիքը, հղում անելով ԱԱԳ-ում աղբյուրին, հայտնել էր, որ Սնոուդենը ԶԼՄ-ներին է փոխանցել 200 հազար փաստաթուղթ, բայց նրան հասանելի են ևս 1.5 մլն գաղտնի փաստաթղթեր, որոնք նա դեռ չի հրապարակել: Մինչ այդ ԶԼՄ-ներն այլ թիվ էին նշում, իսկ Սնոուդենը պնդում էր, որ լրագրողներին փոխանցել է իր ունեցած բոլոր փաստաթղթերը:
