«Հիմա համապատասխան աշխատանքներ են տարվում այդ ուղղությամբ: Բնականաբար, և դիվանագիտական խողովակներով, և կանխարգելիչ միջոցառումներով, նաև կազմակերպական առումով ուսումնասիրում ենք, և իրավիճակը տվյալ հատվածում լրացուցիչ կգնահատվի»,- այսօր լրագրողների հետ զրույցում ասաց պաշտպանության փոխնախարար Արա Նազարյանը՝ անդրադառնալով երեկ Նախիջևանի սահմանային հատվածում ադրբեջանական կողմից հնչած կրակոցներին:
Հիշեցնենք, որ պաշտոնական տեղեկատվության համաձայն՝ այդ կրակոցներից Արարատի մարզում զոհվել է երկու զինծառայող: Փորձագետները կարծում են, որ Հայաստանի՝ Նախիջևանին հարող սահմանին երբևէ նման հարձակումներ չեն եղել, և դա առաջին անգամ էր: Արդյոք սա չի՞ նշանակում, որ հայ-ադրբեջանական արդեն բոլոր սահմաններին ու ընդհանրապես՝ հարաբերություններում լարվածություն է սկսվել:
«Այս պահին ուղղակիորեն արձանագրել, որ լարվածություն է, կարծում եմ՝ վաղաժամ կլինի: Որոշակի քաղաքական սադրանքների առումով խուսափելով խաղաղ ճանապարհով խնդրի լուծումից՝ նմանատիպ պրովոկացիոն քայլեր են անում»,- պատասխանեց Ա. Նազարյանը՝ ավելացնելով, թե նման հարձակումների դեպքում «հակառակորդը միշտ ստանում է արժանի հակահարված»: