«Առաջին լրատվական»-ի զրուցակիցն է ՀՀԿ խմբակցության պատգամավոր Արման Սահակյանը:
– Պարոն Սահակյան, Դուք բիզնես սեփականություն ունեցող պաշտոնյա եք և տեղյակ եք, որ վարչապետ Հովիկ Աբրահամյանը խաղի հավասար կանոններ ստեղծելու մասին հայտարարություն է արել: Մինչև այժմ ի՞նչ կանոններ են գործել բիզնես ոլորտում, և այսուհետ ի՞նչ փոփոխություններ է անհրաժեշտ անել:
– Քանի որ բիզնես դաշտը գործող օրգանիզմ է և անընդհատ վերակառուցվելու կամ ավելի դրական փոփոխությունների կարիք ունի, ես ողջունում եմ վարչապետի կոչը: Բնականաբար հավասար խաղի պայմանները կամ ստվերի հնարավորինս նվազումը երկրին տնտեսական զարգացումներ կբերի, կբերի ներդրումային ավելի բարենպաստ իրավիճակ: Այդ առումով շատ ողջունում եմ այդ հայտարարությունը:
– Այսինքն՝ մինչև հիմա գործարար ոլորտում չի՞ եղել այդ հավասար դաշտը:
– Ամեն տարի ավելի դրական տեղաշարժ եղել է: Եվ հուսով եմ, որ վարչապետի որդեգրած խիստ մոտեցման արդյունքը շատ շուտ կերևա:
– Իսկ վարչապետի այդ հայտարարությունից հետո փոփոխություն նկատե՞լ եք այդ դաշտում, արդեն ստեղծվո՞ւմ է այդ հավասար դաշտը:
– Վարչապետի հայտարարությունը եղել է ընդամենը 20 օր առաջ: Կարծում եմ, որ այդ ընթացքում հրաշքներ չեն լինում: Հուսով եմ, որ ժամանակի մեջ բոլորս էլ կտեսնենք փոփոխությունը:
– Հ. Աբրահամյանն ասաց, թե հուլիսի 1-ից նոր սկսելու ենք նոր խաղի կանոններով աշխատել: Դուք Ձեր բիզնեսում ի՞նչ փոփոխություններ եք անելու:
– Ես անձամբ չեմ կառավարում իմ բիզնեսները, բայց լինելու է այնպես, ինչպես եղել է մինչ այդ: Այն ընկերությունները, որտեղ ես սեփականատեր եմ, մաքուր դաշտում են: Մեր ընկերությունները ստվերում չեն եղել:
– Գործող կառավարման համակարգում հնարավո՞ր է ստվերը կրճատել:
– Գլխավորը ցանկության գոյությունն է, մնացածն արդեն տեխնիկայի հարց է: Ես կարծում եմ՝ այո, հնարավոր է: Ամեն դեպքում վարչապետը նկատի ունի փաստաթղթաշրջանառության պակասը: Այն մարդիկ, ովքեր ձգտում են մաքուր և օրինակելի ընկերություններ ունենալ, կարծում եմ, նրանց այդ կոչը դուր է եկել:
– Եթե հայտարարվում է, որ պետք է հավասար դաշտ ստեղծել, ուրեմն նախկինում այդպես չի եղել: Սա չի՞ նշանակում, որ ստվերի հիմնական պատասխանատուները պետական կառույցներն են:
– Ո՛չ, դուք ուզում եք, որ ես մեղավորների անուններ տամ: Այդպիսի բան չկա: Գլխավորն այն է, որ միտումը կա, այն դեպի դրականն է գնում, և ցանկացած գործարար էլ ուզում է ավելի կանխատեսելի ու հասկանալի դաշտում աշխատել: