Ամերիկացի երգչուհի և դերասանուհի Ուիթնի Հյուսթոնի երկրպագուն 1,5 մլն դոլարով գնել է Մենդեմում (Նյու Ջերսի նահանգ) գտնվող նրա առանձնատունը, հայտնում է ITAR-TASS-ը՝ հղում անելով ամերիկյան ԶԼՄ-ներին:
1986 թվականին կառուցված վիլլայի նոր տերը բժիշկ և ներդրող, երգչուհու մեծ երկրպագու 33-ամյա Մեթյու Քրաութհամերն է:
Առանձնատան մակերեսը 1 200 քմ է: Այն ունի 5 ննջասենյակ, 5 լոգասենյակ, նաև ավտոտնակ 6 ավտոմեքենայի համար, ձայնագրման ստուդիա: Տանը կից 2 հա տարածքում կան լողավազան և թենիսի կորտ: Հենց այդ առանձնատանն է 1992 թվականին տեղի ունեցել Ուիթնի Հյուսթոնի և Բոբբի Բրաունի հարսանիքը:
«Ես շատ եմ ուզում այս տունը պահել ի հիշատակ նրան: Ես գիտեմ, որ նա շատ բարի և շռայլ մարդ էր»,- ասել է Քրաութհամերը: Նա նաև պատմել է, որ ամուսնացած չէ և տանը մենակ է ապրելու, բայց այնտեղ հաճախ երեկույթներ կկազմակերպի:
48-ամյա Ուիթնի Հյուսթոնը մահացել է 2012 թվականի փետրվարի 11-ին Բևերլի Հիլզում՝ թմրանյութերի գերդոզավորումից:
