Հայաստանի բոլոր դեսպաններն այս պահին գտնվում են Երևանում և հանդիպել են վարչապետի հետ: Այս մասին այսօր կառավարության նիստի ավարտին ասաց Հովիկ Աբրահամյանը:
«Ես իրենց առաջարկել եմ, որ իրենք զբաղվեն նաև Հայաստան ներդրումներ ներգրավելու հարցերով: Նաև Հանրապետության նախագահին եմ առաջարկել, որ դեսպանների աշխատանքի գնահատման բաղադրիչ հանդիսանա այն, թե ինչ ներդրումներ են նրանք Հայաստան բերել: Իրենք ասում են, որ իրենց առաջարկները պատշաճ ուշադրության չեն արժանանում նախարարների կողմից, իսկ եթե նույնիսկ արժանանում են, ապա դեսպանները դրա մասին տեղեկացված չեն: Կոնկրետ փաստեր են ասել: Համապատասխան նախարարներին աշխատակազմի ղեկավարը եթե չի ասել, ուրեմն կասի:
Դեսպանները նաև բողոքում են, որ նախարարություններից ներդրումային ծրագրերի առաջարկություններ չեն ստանում: Եթե դեսպանը պետք է հանդիպի տվյալ երկրի գործարարների, ներդրողների հետ, ապա ինքը պետք է ունենա ծրագրեր, որպեսզի ներկայացնի դրանք ներդրողներին: Այստեղ համապատասխան նախարարությունները պետք է մտածեն, որպեսզի դեսպաններին լիարժեք ներդրումային ծրագրեր տրամադրեն: Դեսպանների ներգրավումը այս աշխատանքներին, համոզված եմ, կտա իր դրական արդյունքը, և մենք պետք է շատ հստակ աշխատենք մեր դեսպանների հետ»,- հայտարարեց վարչապետ Հովիկ Աբրահամյանը:
