Կենտրոնական բանկը (ԿԲ) երեկ հրապարակեց այս տարվա ապրիլ ամսին արտասահմանյան մասնավոր տրանսֆերտների վերաբերյալ տվյալները, որոնք հաստատում են բոլոր այն մտավախությունները, որ Հայաստանի տնտեսությունն առաջիկայում լուրջ խնդիրներ է ունենալու:
Այսպես, ըստ այդ տվյալների` դեպի Հայաստան կատարված ոչ առևտրային փոխանցումների զուտ ներհոսքը (ընդհանուր ներհոսքից հանած արտահոսքը) այս տարվա ապրիլին նախորդ տարվա ապրիլի համեմատ աճել է ընդամենը 617 հազար դոլարով կամ 0.6%-ով: Հիշեցնենք, որ ԿԲ-ի վերջերս հրապարակած դրամավարկային քաղաքականության ծրագրում (գնաճի հաշվետվությունում) այս տարվա համար ակնկալվում է դրամական փոխանցումների 4.5-6.5% աճ:
Աղյուսակ 1. Ֆիզիկական անձանց ոչ առևտրային նպատակով կատարած դրամական փոխանցումների զուտ ներհոսքը ՀՀ բանկային համակարգի միջոցով
Ուշագրավ է, որ աճի նվազման միտումը գնալով մեծանում է: Այսպես, այս տարվա առաջին 2 ամիսներին զուտ մասնավոր տրանսֆերտների աճը (նախորդ տարվա առաջին 2 ամիսների համեմատ) ավելի նշանակալի թիվ էր՝ 9.2%, մարտին այն դարձավ 1.4% և ապրիլին, ինչպես արդեն նշվեց, 0.6% (Աղյուսակ 1): Սա նշանակում է, որ նման միտումների պահպանման դեպքում առաջիկա ամիսներին արտաքին տրանսֆերտները կարող են նվազել: Հատկապես որ առևտրային փոխանցումներն արդեն իսկ նվազման միտում են դրսևորում (Աղյուսակ 2):
Ինչպես երևում է երկրորդ աղյուսակից, այս տարվա առաջին 2 ամիսներին առևտրային նպատակով կատարված փոխանցումները գրեթե չեն փոխվել: Սակայն 2014-ի մարտին և ապրիլին դրանք նշանակալիորեն (ավելի քան 14 տոկոսով) նվազել են:
Աղյուսակ 2. Առևտրային նպատակով կատարած դրամական փոխանցումների զուտ ներհոսքը ՀՀ բանկային համակարգի միջոցով
Համադրելով այս թվերը Ազգային վիճակագրական ծառայության՝ օրերս հրապարակած տնտեսական աճի տվյալների հետ, կարող ենք առավել հստակ պատկերացում կազմել Հայաստանի այսօրվա ընդհանուր վիճակի վերաբերյալ: Այս տարվա առաջին եռամսյակում Համախառն ներքին արդյունքը նախորդ տարվա առաջին եռամսյակի համեմատ աճել է ընդամենը 3.1%-ով (տնտեսական աճ): Սա մոտ 2 անգամ ավելի քիչ է, քան նախորդ տարվա առաջին եռամսյակի համապատասխան ցուցանիշն էր: 2013-ի առաջին եռամսյակում 2012-ի առաջին եռամսյակի համեմատ աճը 7.1% էր:
