«Ձևեր մի թափի, սուտմեռուկի մի տուր». ասել է որդին ու բռունցքի հարվածով սպանել մորը

Արմավիրի մարզի ընդհանուր իրավասության դատարանում Արթուր Ադամյանի նախագահությամբ ավարտվել է Վարդան Ստեփանյանի գործի դատական քննությունը:

Ըստ մեղադրանքի՝ Արմավիրի մարզի Հացիկ գյուղի 37-ամյա բնակիչ Վարդան Ստեփանյանը կնոջ, երկու անչափահաս երեխաների և մոր հետ ապրել է լարված փոխհարաբերությունների պայմաններում: Նա հաճախ է ալկոհոլային խմիչք օգտագործել:

2013 թվականի հուլիսի սկզբին Վարդանը վիճել է կնոջ հետ: Վերջինս երեխաներին վերցրել ու գնացել է իր հայրական տուն:

Վարդանի մայրը՝ Վերգուշը, որդու հետ վիճաբանությունների ժամանակ հաճախ ասել է, թե տունը և սեփականաշնորհված հողամասը պետք է վաճառի ու տեղափոխվի Մեծամոր՝ դստեր տուն՝ Վարդանին թողնելով առանց միջոցների ու առանց տան:

Մոր նմանատիպ արտահայտությունները մշտապես զայրացրել են Վարդանին:

2013 թվականի հուլիսի 29-ի ուշ երեկոյան Վարդան Ստեփանյանը տանը հաց ուտելիս խմիչք է օգտագործել, ինչը դուր չի եկել նրա մորը: Վերգուշը սկսել է նախատել որդուն՝ ալկոհոլը չարաշահելու, կնոջ ու չամուսանացած քրոջ հետ անհաշտ հարաբերություններ ունենալու համար:

Մոր և որդու միջև վիճաբանությունը տևել է մոտ մեկ ժամ:

Ըստ մեղադրանքի՝ «մորը լռեցնելու համար Վարդան Ստեփանյանը երկու ձեռքերի ափերն իրար հպած՝ դիտավորությամբ բազմաթիվ հարվածներ է հասցրել մոր գլխին, ինչից մայրն ուշագնաց է եղել: Վարդանը մորն ուշքի բերելու համար գլխին ջուր է լցրել ու գնացել իրենց խաղողի այգի:

Վերգուշ Սարգսյանը, ուշքի գալով, գնացել է հարևանուհու տուն, խնդրել, որ նա զանգահարի իր դուստր Սիմային: Մայրը դստեր հետ խոսել է ու ասել, որ Վարդանը ծեծել է իրեն, խնդրել է գալ ու իրեն գյուղից տանել:

Դուստրն ասել է, թե արդեն ուշ է: Խնդրել է, որ մայրն այդ գիշեր մնա հարևանուհու տանը, առավոտյան ինքը մեքենայով կգա մոր հետևից:

Վերգուշ Սարգսյանը մնացել է հարևանուհու տանը, բայց անընդհատ գանգատվել է գլխացավից: Գիշերը նրա վիճակը վատացել է, նա սկսել է փսխել:

Հարևանուհին շտապօգնություն է կանչել:

Վերգուշ Սարգսյանին տեղափոխել են հիվանդանոց, որտեղ նա գիտակցության չգալով՝ առավոտյան ժամը 9-ն անց 50 րոպեին մահացել է:

Նախաքննական մարմինը Վարդան Ստեփանյանին մեղադրանք է առաջադրել մոր առողջությանը դիտավորությամբ ծանր վնաս հասցնելու համար, ինչի հետևանքով մայրը մահացել է՝ ՀՀ քրեական օրենսգրքի 112 հոդվածի 2-րդ մասի 1-րդ կետով:

Ընդհանուր իրավասության դատարանում Վարդան Ստեփանյանն իրեն մեղավոր չի ճանաչել՝ պատճառաբանելով, թե ինքը ձեռքը կիսաբռունցք արած ընդամենը 2 անգամ… կամաց… հարվածել է մոր գլխին, իսկ վիճաբանության ժամանակ մայրն ընկել է ու գլուխը մի քանի անգամ դիտավորյալ հարվածել է գետնին:

Ինքը բռնել է մոր ձեռքերից, որ թույլ չտա՝ նա գլուխը գետնին հարվածի:

Նախաքննական ցուցմունքում Վարդան Ստեփանյանը հայտնել է, թե վիճաբանությունների ժամանակ մայրը հաճախ ասել է, որ տունն ու խաղողի այգին պետք է վաճառի, գումարը բաժանի դուստրերի միջև ու տեղափոխվի աղջկա տուն՝ Մեծամոր՝ որդուն թողնելով առանց ապրուստի միջոցների ու առանց տան:

Դեպքի պահին մոր գլխին բռունցքով մի քանի անգամ հարվածելուց հետո տնից դուրս է եկել ու գնացել խաղողի այգի:

Տուն է վերադարձել հաջորդ առավոտյան՝ ժամը 7-8-ի սահմաններում: Տեսել է՝մայրը տանը չէ, դռները բաց են: Փակել է մուտքի դուռը ու կրկին գնացել է հողամաս, որտեղից էլ բերման են ենթարկել ոստիկանները:

Տուժողի իրավահաջորդ է ճանաչվել Վարդանի քույրը՝ մահացած Վերգուշի դուստր Սիման:

Նա հայտնել է, թե կնոջ ու երեխաների հեռանալուց հետո եղբայրն ավելի նյարդային էր դարձել:

Երբ մայրը հարևանուհու տնից զանգել ու խնդրել է իրեն տանել, ինքը, լսելով մոր ձայնը, հարևանուհու ասածը՝ թե մոր վիճակը լավ է, որոշել է առավոտյան գնալ գյուղ, խնդրել է, որ հարևանուհին մորը այդ գիշեր պահի իրենց տանը:

Հարևանուհին իր ցուցմունքում հայտնել է, որ Վարդանենց տանը վիճաբանությունները հիմնականում նրա խմած ժամանակ են եղել: Վերգուշ Սարգսյանը հաճախ կռվի թեժ պահին փախել է իրենց տուն՝ մինչև Վարդանը հանդարտվի:

Հուլիսի 30-ին, գիշերվա ժամը 1-ին իրենց տուն է եկել Վերգուշը, լաց լինելով վախեցած խնդրել է, որ դուռը փակեն, Վարդանը ներս չգա: Ասել է, թե մի կերպ փախել է տնից:

Վերգուշի մազերն ու հագուստը թաց են եղել: Նա հայտնել է, թե երբ Վարդանը հարվածել է իր գլխին, ինքն ուշագնաց է եղել, Վարդանը ջուր է լցրել վրան, ուշքի բերել՝ ասելով. «Ձևեր մի թափի, սուտմեռուկի մի տուր»:

Վերգուշը հայտնել է նաև, թե որդին ձեռքերն իրար միացրած, վերևից ներքև շարժումներ անելով՝ բազմաթիվ հարվածներ է հասցրել իր գլխին:

Վերգուշը հարևանուհուն չի ասել, թե ինքը գլուխը գետնին է հարվածել: Նա անընդհատ գանգատվել է գլխի ցավից, բայց սկզբում չի թողել, որ շտապօգնություն կանչեն, ասել է՝ արդեն լավ եմ: Գիշերը նրա վիճակը վատացել է…

Վարդան Ստեփանյանի կինը հայտնել է, թե ընտանիքի հոգսը եղել է Վարդանի ուսերին, նա դժվարությամբ է ապրուստ վաստակել, դրա պատճառով ավելի կոնֆլիկտային է դարձել:

Սոցիալական ծանր պայմանների պատճառով Վարդանը սկսել է չարաշահել խմիչքը, իսկ դրա պատճառով էլ վիճաբանություններ են եղել տանը:

Սկեսուրը հաճախ էր դժգոհում ամուսնու գերեզմանին շիրմաքար չլինելու, ընտանիքի նյութական ծանր վիճակի պատճառով:

Դատարանում կինն ասել է, թե ամուսինը երբեք մորը չի ծեծել, չի հրել:

Դատաբժշկական փորձաքննության եզրակացությամբ՝ Վերգուշ Սարգսյանի մահը վրա է հասել գլխուղեղի կենսական կարևոր ֆունկցիաների սուր խանգարումից՝ գանգուղեղային փակ, բութ վնասվածք ստանալու հետևանքով:

Դիակի ուսումնասիրությամբ հայտնաբերվել են նաև աջից 3-4-5-6-րդ կողերի միջին անրակային գծով տեղախախտված ուղղակի կոտրվածքներ, արյունազեղումներ գլխի մաշկի տակ և այլ հատվածներում:

Տուժող Վերգուշ Սարգսյանի հագին եղած սև կիսաթև վերնաշապիկը գրեթե ամբողջությամբ եղել է թրջված: Վերնաշապիկի եզրային կարը քանդված է եղել, քանդված տեղամասեր են եղել նաև ձախ թևքի շրջանում, իսկ աջ թևքի հետին հատվածում առկա են եղել պատռված մասեր…

Ընդհանուր իրավասության դատարանը հաստատված է գնահատել Վարդան Ստեփանյանին առաջադրված մեղադրանքը՝ ՀՀ քրեական օրենսգրքի 112 հոդվածի 2-րդ մասի 14-րդ կետով:

Վարդան Երջանիկի Ստեփանյանը դատապարտվել է 6 տարի 6 ամիս ազատազրկման:

Պատժի սկիզբը՝ 2013 թվականի հուլիսի 31-ից:

Հայրանունով Վարդանը «Երջանիկի» է, բայց մոր վրա ձեռք բարձրացնողը իրապես երջանիկ լինել կարո՞ղ էր…

Կռվով լի տան շեմին մի օր էլ դժբախտությունն է չոքում…