Ֆրանսիայի նախկին նախագահ Նիկոլա Սարկոզիի կինը՝ երգահան, բանաստեղծուհի, երգչուհի, դերասանուհի, մոդել Կարլա Բրունին, այժմ իր ողջ ժամանակը նվիրում է երաժշտությանը: Այս մասին գրում է 7 days.ru կայքը:
Նշենք, որ Բրունին երկարատև ընդմիջումից հետո՝ 2003-ին, 29 տարեկանում որոշեց կրկին զբաղվել երաժշտությամբ: Հենց այդ ժամանակ էլ նա թողարկեց «Որևէ մեկն ինձ ասաց» ալբոմը:
Կարլա Բրունին նկարահանվել է նաև 17 ֆիլմերում, որոնց թվում են Ալեն Բերբերյանի «Պապարացի»-ն և Վուդի Ալենի «Կեսգիշերը Փարիզում» ֆիլմերը:
Նույնիսկ 2007-ին Նիկոլա Սարկոզիի հետ ծանոթությունը չազդեց նրա ստեղծագործական կյանքի վրա: Դառնալով Ֆրանսիայի առաջին տիկին՝ նա շարունակեց գրել երգերի բառեր և երաժշտություն:
Հունիսի երկուսից նա առաջին անգամ համերգներով ելույթ է ունենում Մոսկվայում:
Ի դեպ, Բրունին նշել է, որ իր ամուսինն ամեն կերպ աջակցում է իրեն, ավելին՝ երբ նա իր կողքին է, ինքն իրեն ավելի հանգիստ և վստահ է զգում:
Կարլա Բրունիի խոսքերով՝ հսկայական տարբերություն կա շրջագայությունների միջև՝ որպես Ֆրանսիայի առաջին տիկին և որպես երգչուհի: Առաջին դեպքում նա ուղեկցել է ամուսնուն պաշտոնական հանդիպումների ժամանակ, մարդասիրական առաքելություններ իրականացրել, սակայն այդ ամենը ենթադրել է կանոնների հստակ շրջանակ, որոնց ենթարկվել է պետք:
Իսկ համերգային շրջագայության ժամանակ շրջանակները շատ բնական են և կարող են ցանկացած պահի փոփոխվել՝ դա կապված է երաժշտության հետ:
