Միջազգային այն հարթակը՝ ԵԱՀԿ Մինսկի խումբը, որը զբաղվում է ԼՂ խնդրի կարգավորմամբ, հիմա լուրջ վտանգի տակ է, քանի որ Ռուսաստանը շատ կուզենար, որ Մինսկի խմբի արդյունավետությունը նվազեր և ողջ տարածաշրջանում ԼՂ խնդրի լուծման բոլոր լծակները վերցներ իր ձեռքը, և դա արվում է Հայաստանին գործընկերության որևէ շրջանակից դուրս մղելով: Այս մասին այսօր՝ «Գործընկերություն հանուն բաց հասարակության» նախաձեռնության հրավիրած «Հայաստանի գոյության մարտահրավերները՝ Եվրասիական միության նոր զարգացումների ներքո» խորագրով հանրային քննարկման ժամանակ, հայտարարել է Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:
Նրա խոսքով՝ այսօր Հարավային Կովկասում մեծ թափով մեծանում է միլիտարիզացիայի մակարդակը, որի հիմնական դերակատարներից մեկը Ռուսաստանն է: «Այսինքն՝ այն պետությունը, որն առաջին պատասխանատուն է ապակայունացնող գործողությունների, նաև աջակցում է սպառազինությունների մեծացմանը: Ուժի սպառնալիքի մեծացման ավելի վտանգավոր գործոն գոյություն չունի»,-հայտարարել է Սաքունցը՝ հիշեցնելով, որ Մինսկի խմբի սկզբունքներից մեկը ուժի գործադրումից հրաժարումն է, իսկ այդ խմբի անդամներից մեկը՝ Ռուսաստանը, զինում է տարածաշրջանն ու այդ տարածաշրջանում իր ռազմակայանը:
Անդրադառնալով Աստանայում Եվրասիական բարձրագույն տնտեսական խորհրդի՝ մայիսի 29-ին կայացած նիստում Նազարբաևի հայտնի հայտարարությանը՝ Սաքունցը նկատել է. «Միանշանակ է, որ եթե Նազարբաևի փոխարեն Պուտինը նման հարց բարձրացներ, ապա նա, որպես համանախագահ երկիր, իրեն կդներ շատ խոցելի վիճակի մեջ: Բայց դա բնավ չի փոխում հարցի էությունը, որովհետև Նազարբաևն այդ հարցը բարձրացրել էր Պուտինի ցանկությամբ»:
Լուսանկարը` PAN Photo-ի
