«Թամարա» ՍՊԸ-ի տնօրեն Խաչատուր Պողոսյանը համաձայն չէ Սննդամթերքի անվտանգության պետական ծառայության մայիսի 30-ի որոշման հետ, որով արգելվել է «Թամարա» ՍՊԸ-ի կողմից «20 կոպեկ», «Կարմեն» և «Թթվասեր 200գ» արտադրատեսակների արտադրությունը, քանի որ իրականացված ստուգման ընթացքում վերոնշյալ արտադրատեսակների արտադրության փուլում հայտնաբերվել է վտանգավոր սննդամթերքի թողարկում:
«Ես համաձայն չեմ: Ոչ մի բան էլ չկա, իրենք հաղորդագրության մեջ նշել են վտանգավոր սննդամթերք, բայց ոչ մի այդպիսի բան էլ չկա: Պարզապես նմուշառումից աղիքային ցուպիկ է հայտնաբերվել, որը նորմայից շատ աննշան է բարձր. պետք է լինի 1 միլիոն, եղել է 1 միլիոն 100 հազար: Դա իրենից որևէ վտանգավորություն չի ներկայացնում՝ դրանից ո՛չ թունավորվում են, ո՛չ հիվանդանում, ոչ էլ ինչ-որ բան»,- «Առաջին լրատվական»-ի հետ զրույցում ասաց Պողոսյանը:
Նրա խոսքով՝ Սննդամթերքի անվտանգության պետական ծառայության կողմից նմուշառումը եղել է մայիսի 21-ին, որից հետո իրենք արագ հեռացրել են խախտումները, և արդեն մի քանի օր է՝ նշված ապրանքները թողարկում և բաց են թողնում շուկա: Իսկ ամսի 21-ի արտադրանքը հետ է կանչվել շուկայից:
Տնօրենը մտավախություն չունի, որ այս դեպքից հետո իրենք խնդիր կունենան շուկայում: «Ճիշտ է, ինչ-որ բանի վրա կազդի, բայց մենք 70 տեսակի պաղպաղակ ենք արտադրում, որոնք շատ լավ իրացվում են»:
Պողոսյանը նաև նշեց, որ հնարավոր է՝ բողոքարկեն կայացված որոշումը, բայց միևնույն ժամանակ չեն ուզում ավելորդ դատական քաշքշուկի մեջ մտնել: «Մեզ մոտ ստուգումներ հաճախակի են լինում, բայց երբեք ոչ մի նման բան չի հայտնաբերվել: Եվ ինձ համար անհասկանալի է, թե սա ինչպես եղավ: Չեմ ուզում ինչ-որ կանխավ կասկածներ հայտնել, բայց ինչ-որ միտում եմ տեսնում»:
