Ազգային ժողովի անկախ պատգամավոր Խաչատուր Քոքոբելյանը հունիսի 2-ին խորհրդարանում 2013-ի բյուջեի կատարողականի հաշվետվության քննարկման ժամանակ Տրանսպորտի և կապի փոխնախարար Արթուր Առաքելյանից հետաքրքվեց՝ Աբխազիայով դեպի ՌԴ ելք հանդիսացող երկաթգծի կառուցման աշխատանքներն ի՞նչ փուլում են:
Փոխնախարարը պատասխանեց, որ մոտավոր ուսումնասիրություններ են արվել, ըստ որոնց՝ շուրջ երկու հարյուր միլիոն դոլարի ներդրում է պահանջվում նշված հատվածում երկար տարիներ չշահագործված երկաթգծի վերանորոգման և շահագործման համար: Առաքելյանի կարծիքով՝ այս պահին տնտեսական խթանը բացակայում է, որպեսզի ներդրողը գտնվի ու ցանկություն ունենա ներդրում անել՝ ի տարբերություն Իրան – Հայաստան երկաթգծի, որի որոշակիանալուն պես ներդրողները կգտնվեն: Փոխնախարարը նշեց, որ Աբխազիայի երկաթգծի համար աշխատանքներ տանում են:
Պատգամավորը նախ նկատեց, թե փոխնախարարի ասածի շատ տեղին է, ապա նշեց, որ տնտեսական խթանը բացակայում է երկաթգիծը վերանորոգելու համար, ինչից կարող ենք եզրակացնել՝ տնտեսվարողներին դեպի Ռուսաստան կամ Ռուսաստանից դեպի Հայաստան գիծը շատ չի հետաքրքրում: «Կներեք սա քաղաքական մասն էր»,- ասաց նա:
Լուսանկարը՝ Photolure-ի