Մանդատից հրաժարված «Բարգավաճ Հայաստան» խմբակցության պատգամավոր Գրիգոր Գրիգորյանին (Շերիֆ ) փոխարինելու է ԲՀԿ-ական Տիգրան Ներսիսյանը: Մինչդեռ կուսակցության համամասնական ցուցակում հերթը Հայաստանի եզդիական համայնքի ներկայացուցիչ Ռուստամ Մախմուդյանինն էր: Վերջինս Հայաստանի դատական դեպարտամենտի կազմակերպաիրավական վարչության պետն է, կուսակցության անդամ չէ:
«Առաջին լրատվական»-ի հետ զրույցում Մախմուդյանն ասաց, որ նախընտրական շրջանում ԲՀԿ-ն եզդիների աջակցության դիմաց՝ խոստացել է իրենց ներկայացուցչին ընդգրկել ցուցակում և «հերթը նրան հասնելու դեպքում» պատգամավորական մանդատ տալ: Կուսակցությունն անտեսել է նաև եզդիական համայնքի նամակ-խնդրանքն ուղված կուսակցությանն այն մասին, որ իրենց ներկայացուցչին խոստացածի համաձայն մանդատ տան: Ներկայացնում ենք «Առաջին լրատվական»-ի հարցազրույցը Ռուստամ Մախմուդյանի հետ:
– Պարոն Մախմուդյան, ինչո՞ւ Ձեր փոխարեն «Բարգավաճ Հայաստանը» որոշեց մանդատ տալ Տիգրան Ներսիսյանին:
– Այն, ինչ որ ես իմացել եմ, իմացել եմ մամուլից և խմբակցության մամլո խոսնակի տված հացազրույցներից: Եթե վերանանք կոնկրետ իմ հարցից, ապա պետք է նշեմ հետևյալը՝ համամասնական ցուցակով թափուր մնացած հաջորդ պատգամավորի համալրումը ոչ թե կուսակցության խորհրդի որոշման հարցն է, այլ Ընտրական օրենսգրքով սահմանված ընթացակարգ է, որի մասին, ի դեպ, ԿՀԸ մամլո խոսնակ Հերմինե Հարությունյանն էլ էր արդարացիորեն մեկնաբանել: Եթե ցուցակում իքս անձը դուրս է գալիս և թափուր պատգամավորական մանդատը պետք է համալրվի, ապա մեխանիկորեն նրան պետք է փոխարինի այն անձը, ով ցուցակում հաջորդն է: Այդ տեղը կարող է չհամալրվել, բացառապես թեկնածուի կողմից նոտարական կարգով հրաժարականի դիմում ներկայացնելու դեպքում կամ անձամբ Կենտրոնական ընտրական հանձնաժողով ներկայանալու դեպքում: Պաշտոնապես որևէ մեկից որևէ դիմում չեմ ստացել, բայց նորից եմ կրկնում՝ հարցը լուծվում է իրավական ճանապարհով: Այսինքն՝ տեղին չէ իրավական լուծման ընթացակարգի փոխարեն հղում կատարել խորհրդին և ասել խորհուրդն է որոշում: Խորհուրդն ի սկբզբանե ցուցակը ներկայացրել է Կնետրոնական ընտրական հանձնաժողով:
– Ի՞նչ եք կարծում ինչո՞ւ Ձեր հանդեպ այդպես վարվեցին, տարաձայնությո՞ւն ունեիք:
– Տարաձայնություններ չեն եղել: Ես երբևէ որևէ խնդիր չեմ ունեցել, չի եղել՝ իսկապես որևէ տարաձայնություն չի եղել: Ես առաջարկությամբ համայնքի, ինչու չէ՝ նաև իրենց առաջարկությամբ առաջադրվել եմ, բայց առաջադրվելուց հետո այդպես էլ մնաց, որովհետև հերթը չէր հասնում, և ոչինչ անել չէր լինում, օբյեկտիվ էլ չէր, համարը չէր հասել: Այլ բան է, որ համարը գալիս հասնում է, և համարի հետ կապված փոխատեղումներ են լինում: Իմ ունեցած տեղեկություններով՝ այդ տղան, որ պետք է անցներ, վեց, թե յոթ համար հետո էր:
–Բայց ինչո՞ւ, ըստ Ձեզ, այդպես վարվեցին, առհասարակ Դուք ինչպե՞ս եք հայտնվել ԲՀԿ համամասնական ցուցակում, երբ կուսակցության անդամ չէիք:
–Նրանք խոսք են տվել Հայաստանում ապրող ամենամեծ ազգային փոքրամասնությանը՝ եզդիական համայնքին, որ դուք լինում եք միասին, համախմբված, սատարում եք այդ քաղաքական ուժին՝ մենք էլ ձեր ներկայացուցչին տանում ենք Ազգային ժողով: Սա եղել է համայնքին տված խոստում, Արագածոտնի մարզում նաև եղել է կուսակցության ղեկավարի և համայնքի ներկայացուցիչների միջև հանդիպում, այլ պատճառաբանություններ չունենք: Լավ կլիներ, որ այդ պատճառները պարզեիք այն իրավասու սուբյեկտներից, որոնք պետք է որ պատասխանեին այդ հարցերին:
–Փաստորեն, ԲՀԿ-ում մի բան խոստանում, այլ բան են անում:
–Քանի դեռ որևէ տեսակի պաշտոնական հրապարակումներ չկան, այս պահին դժվարանում եմ նման բան ասել: Ձեզ հետ միասին հետևելով մամուլի զարգացումներին՝ նկատում եմ, որ տենդենցը դրան էր տանում: Իմ թեկնածության առաջադրումը եղել է հանրության և մեր համայնքի ներկայացուցիչների հետ համաձայնեցնելով, իմ ակտիվության մասին պետք որ բարեխղճորեն վկայեն նաև այդ կուսակցության այժմյան պատգամավորները: Պետք է նկատեն, որ եզդիական համայնքը այդ քաղաքական ուժին սատարելը պայմանավորել է իր ներկայացուցչի համապատասխան ցուցակում լինելու հանգամանքով:
–Բայց ինչ–որ բան չե՞ն բացատրել դրանից հետո․ ասենք՝ տեղեկացնեին գոնե, որ Դուք չեք լինելու պատգամավոր:
–Ոչ մի զրույց չեմ ունեցել:
–Դուք կուսակցության համամասնական ցուցակում եք, բայց ԲՀԿ անդամ չեք: Ի՞նչ եք մտածում առհասարակ այդ կուսակցության գործունեության մասին խորհրդարանում:
–Երբ կգա այն ժամանակահատվածը, որ կունենամ այդ կարգավիճակը, ամենայն պատասխանատվությամբ խոստանում եմ իմ կարծիքն այդ մասին հայտնել: Այս պահին միայն որպես ՀՀ քաղաքացի ունեմ կարծիք: