ԱՄՆ պետքարտուղար Ջոն Քերին Պաղեստինի ազգային վարչակազմի ղեկավար Մահմուդ Աբասի հետ գիշերը կայացած հեռախոսազրույցում անհանգստություն է հայտնել պաղեստինյան նոր կառավարությունում ՀԱՄԱՍ շարժման մասնակցության առնչությամբ: Այս մասին հայտնում է France Press գործակալությունը՝ հղում անելով Պետդեպի ներկայացուցիչ Ջեն Պսակիին:
Զրույցի ընթացքում Քերին ու Աբասը քննարկել են հարցեր, որոնք վերաբերում են ՖԱԹՀ և ՀԱՄԱՍ շարժումների «ազգային համաձայնության» կառավարության ձևավորմանն ու Իսրայելի հետ խաղաղ բանակցություններին:
Զրույցի ժամանակ պետքարտուղարը նշել է կարևորությունն առ այն, որ նոր կառավարությունը հետևի բռնի մեթոդների կիրառումից հրաժարվելու, իսրայելական պետությունը ճանաչելու ու նրա հետ նախկինում ձեռք բերված համաձայնագրերն ընդունելու սկզբունքներին: Աբասը Քերիին վստահեցրել է, որ նոր կառավարությունը հավատարիմ կմնա այդ սկզբունքներին:
Սպասվում է, որ կառավարությունը կերդմնակալի այսօր:
