«Առաջին լրատվական»-ի զրուցակիցն է ԵՀՄՖ նախագահ Աշոտ Գրիգորյանը:
– Պարոն Գրիգորյան, նախկինում նշել էիք, որ ձևավորված նոր կառավարությունից որևէ սպասելիք չունեք՝ հաշվի առնելով որոշ նախարարների՝ նախկինում ծավալած գործունեությունը: Այդուհանդերձ՝ բացառո՞ւմ եք որևէ համագործակցություն՝ Հայաստանում ներդրումներ կատարելու իմաստով:
– Առանձնապես հույսեր չենք փայփայում նաև հիմա, բայց մյուս կողմից՝ Հայաստանի տնտեսությունը համարյա ոչնչացման եզրին է, և ֆորումը մի շարք վերլուծություններից ու քննարկումներից հետո որոշում ընդունեց, որ պետք է փորձենք տնտեսության վերականգնման համար որոշակի քայլեր անել: Նախատեսվում է, որ հունիսի 19-22-ը սլովակ և չեխ գործարարների համար պետք է այց կազմակերպենք Հայաստան մեր հովանու ներքո: Այն, ինչ որ մենք կարողանում ենք անել, կարծես ոչ մեկը չի պատրաստվում կամ չի կարողանում անել, և այդ ամենը ստիպում է մեզ, որ, այնուամենայնիվ, փորձենք ձեռք մեկնել Հայաստանի կառավարությանը:
Ամենակարևորն այսօր «Նաիրիտ»-ի վերականգնման հարցն է, որը եթե ևս կես կամ մեկ տարվա ընթացքում հնարավոր չլինի անել, ըստ մեր կանխատեսումների՝ այլևս հնարավոր չի լինի վերականգնել: Կոնկրետ «Նաիրիտ»-ի հարցում շատ լուրջ սպասելիքներ ունենք կառավարությունից և մասնավորապես՝ վարչապետից: Գիտեք՝ նախկին վարչապետը մտածված այնպիսի վիճակի է հասցրել միակ համաշխարհային մակարդակի արտադրությունը, որը մեր երկիրն ուներ, այնպես է ոչնչացրել, որ երևի թուրքը կամ ադրբեջանցին կերազեին ու չէին կարողանա անել: Գիտե՞ք ինչ պարտքերի տակ է հայտնվել գործարանը: Այդ մի քանի հարյուր միլիոնանոց պարտքերով աշխարհում չկա որևէ գործարար, որ պատրաստ լինի վերցնել գործարանն ու վերականգնել: Այսինքն՝ այսօրվա վարչապետի հետ լուրջ խոսակցություն ենք ունենալու: Բանակցելու ենք նաև համապատասխան նախարարների հետ, և եթե նրանք հասկանան իրավիճակի լրջությունը ու կատարեն այն ամենը, ինչ պահանջում ենք, արդյունքն անկասկած լավ կլինի:
Մենք ունենք ճգնաժամային պայմաններում գործող ներդրողների թիմ, որոնք մասնագիտացել են նման գործարաններ վերականգնելու հարցում: Նրանց մենք կարողացել ենք հետաքրքրել: Մեր թիմում կան նաև այլ կարևոր ոլորտների մասնագետներ և գործարարներ: Ունենք հատկապես էներգետիկայի ոլորտում լուրջ ծրագրեր, և այդ բոլոր գործարարների հետ մեր ծրագրերով գալու ենք Հայաստան:
– Իսկ մտավախություն չունե՞ք, որ այս կառավարությունն այդ բոլոր ծրագրերը կոչնչացնի:
– Իհարկե, շատ մեծ կասկածներ ունենք և քիչ վստահություն, որ կոռուպցիայի սովոր մարդկանց հետ մեր ներդրողները կհամագործակցեն: Նախարարներից շատերը հայտնի են կոռուպցիոն գործարքների մեջ մասնակցությամբ՝ հատկապես ֆինանսների նախարարը, որը հայտնի է եղել իր վարքով և մաքսայինում զբաղվել է կողոպուտներով. բոլորդ էլ գիտեք, թե հարկայինում ինչ գործունեություն է նա ծավալել: ՀՀ-ում տնտեսության այնպիսի հայտնի թշնամի, ինչպիսին Գագիկ Խաչատրյանն է, չկա, իսկ նա հիմա ավելի բարձր պաշտոն է ստացել: Բնական է, որ այսպիսի կառավարությունը մեզ ոչ մի հույս չի ներշնչում, չենք մտածում, որ ինչ-որ բան հեշտորեն է ստացվելու, բայց այլ ելք չունենք։ Վարչապետ կոչված Տիգրան Սարգսյանը կարողացել է բոլոր ոլորտներում զարգացնել բարձրագույն մակարդակով կողոպուտ կազմակերպելու արվեստը, և մենք չենք էլ պատկերացնում, թե առանց նրան պատժելու, առանց նրա բոլոր արածները երևան հանելու ինչպես ենք կարողանալու վերականգնել հավատը մարդկանց մոտ: Մենք ստիպված են այս վիճակում աշխատել և ձեռք ենք մեկնում ՀՀ տնտեսության վերականգնման գործին՝ չիմանալով, թե ինչ կստացվի:
– Բայց Ձեզ վարչապետի խոսքերն անկե՞ղծ են թվում, թե՞ պոպուլիստական, պարզապես PR քայլեր:
– Մեկ ամիս հետո մենք գործնականորեն կպարզենք՝ դա PR քա՞յլ է, թե՞ լուրջ ցանկություն: Այժմ մտածում ենք՝ գուցե դա անկեղծ ցանկություն է, սակայն արդյոք նա ի վիճակի՞ է իր անկեղծ ցանկությունն իրականացնել: Ըստ իս՝ այնուամենայնիվ, ավելի շատ թվում է, թե դա անկեղծ ցանկություն է, քանի որ հենց PR քայլերով է այս երկիրը հասել անդունդի եզրին: Այսօր մեր թշնամիները՝ ատամները սրած, դարան են մտել և սպասում են հարմար առիթի։ Ըստ մեր կանխագուշակումների՝ թեժ ամառ է լինելու սահմանների վրա, Աստված չանի՝ եթե հանկարծ պատերազմ սկսվի, ապա մինչ այսօր արված PR-ները փուչիկների պես կտրաքեն: Շատ շատ լուրջ կանխագուշակում է, և մենք սարսափելի անհանգստացած ենք իրավիճակով:
Ես կարծում եմ, որ վարչապետը իսկապես պատկերացնում է այս իրականությունից բխող արհավիրքը և իսկապես երազում է անել այն, ինչ ասում է, բայց առաջինը դրա համար պետք է նա ունենար այնպիսի հեղինակություն, որ արտերկրից բոլորը ոգևորվեին ու գային Հայաստան՝ ներդրումներ կատարելու: Այ, մենք այդպիսի կառավարություն էինք սպասում: Եվրոպայի և մյուս տարածաշրջանների հայերը պատրաստ էին մտնել Հայաստան ու անել այն, ինչ օդի պես պետք էր երկրին և տնտեսության վերականգնմանը, այսինքն՝ անել այն, ինչ մենք ենք պատրաստվում անել: Սակայն խորը հիասթափությունը շարունակվում է, և գործարարներն ու նույնիսկ երիտասարդ հայ մասնագետները առանձնապես տրամադրված չեն վարչապետ Աբրահամյանին օգնելու: Բոլորը սպասողական վիճակում են, թե նա ինչ քայլեր է ձեռնարկելու և ինչ արդյունք է ունենալու: Բոլորին հետաքրքրում է, թե նրա հետ ինչպես են վարվեու և նրա հետ ինչ է կատարվելու: Ահա այս իրավիճակում մենք ձեռք ենք մեկնում նրան՝ հանուն մեր երկրին օգնելու ցանկության: Հասկացեք, որ այս որոշումն ընդունելու համար մենք շատ երկար ենք քննարկե, քանի որ հիմքում դրված է մեր երկրի լինել-չլինելու հարցը: Վաղը սահմանի վրա եթե կրակեն, ամեն ինչ թողած՝ գալու ենք Հայաստանը փրկելու, ուրեմն պետք է այսօր սկսենք երկրի փրկության գործը, որ վաղը ուշ չլինի: Փորձելու ենք համագործակցել՝ հավատացած, որ անչափ դժվար է լինելու:
Ավելացնենք նաև, որ Եվրոպայում չկա այնպիսի երկիր, որ այդքան հեղինակազրկված նախագահ ունենա: Վերջին դեպքերն ապացուցեցին, որ Սերժ Սարգսյանը ոչ միայն իր երկրում բացարձակապես հարգանք չի վայելում, այլև նույնիսկ իր ռազմավարական գործընկերների մոտ նա սայլի հինգերորդ անիվն է: Այն, ինչ Աստանայում տեսանք, սարսափելի էր: Հայաստանը չունի ԱԳ նախարար և դիվանագիտության նույնիսկ սաղմեր: ՀՀ նախագահը անտեղյակ է գործընթացներից՝ այն աստիճանի, որ քաջություն չի ունենում նույնիսկ թշնամիներին ժամանակին պատասխանելու. չէ՞ որ պահին տրված պատասխանը հարյուրապատիկ ավելի արժեք ունի, քան ուշացած երկարաշունչ ելույթը: Հայ-թուրքական արձանագրությունների արդյունքում ոչ միայն թուրքերը, այլև Սերժ Սարգսյանի ռազմավարական գործընկերներն սկսեցին Արցախի հարցում թշնամու նման պահել: Այո, այսօր չկա որևէ ներշնչող բան, որ հայությանը ոգևորի և հավատ ներշնչի, թե նախագահը և նոր վարչապետը կարող են իրենց առջև դրված ծրագրերը կատարել:
– ԲՀԿ առաջնորդը հայտարարեց, որ կառավարությանը ժամանակ են տալու, Դուք է՞լ եք մտածում, որ արժե ժամանակ տալ:
– Ես առանձնապես համամիտ չեմ «Բարգավաճ Հայաստանի» այդ ձևակերպմանը և ոչ մի ժամանակ էլ չեմ տալիս կառավարությանը, քանի որ, ինչպես հասկացաք՝ ես վերջինիցս ոչ մի սպասելիք չունեմ: Համոզված եմ, որ այդ կառավարություն կոչվածը ունակ չէ, և աբսուրդ է ժամանակ տալ և ինչ-որ բան սպասել: Մենք ինքներս ենք աշխատելու և ինքներս ենք փորձելու ստանալ այն, ինչ որ անհրաժեշտ է երկրին: ՀՀ նոր կառավարությունից ոչինչ չենք սպասում: Համարյա բոլորը հայտնի են իրենց անցյալով, և նախարարությունները տապալող անձինք են՝ ո՞ւմ վա հույս դնենք: Նոր, հզոր անհատներով, որոնցով հայտնի է մեր ազգը արտերկրում, կառավարությունը չհարստացավ: Մեր երկրին պետք են արհեսավարժ և ժամանակակից մենեջմենթին քաջածանոթ անհատներ. միայն Եվրոպայում տասնյակ այդպիսի հայտնի անուններ կան, սակայն նոր կառավարություն կազմվեց նախագահի շրջապատի անհատներից, որոնք արդեն հասցրել են երկիրը հասցնել այս անմխիթար վիճակին: Ես համամիտ չեմ ԲՀԿ-ի մեր ընկերների հետ և դրա համար էլ անում եմ այն, ինչ որ մեր կարծիքով՝ միայն մենք կարող ենք անել. սա է մեր սկզբունքը։ Սպասել այլևս չենք կարող, բայց թե ինչ արդյունք կունենանք՝ նույնպես դժվար է գուշակել: Միայն մի բան է մեզ հայտնի՝ Հայաստանի վերջը կգա, եթե հապաղենք: