«Հրաշալի քառյակի» մաս կազմող երկու ուժերը՝ «Բարգավաճ Հայաստանը» և Հայ Յեղափոխական Դաշնակցությունը, մնում են իրենց նախկին դիրքորոշման՝ գործող նախագահ Սերժ Սարգսյանի հրաժարականը չեն պահանջում:
Հայտնի է նաև, որ քառյակը նախատեսում է հանրահավաքներ անել ինչպես մարզերում, այնպես էլ Երևանում: Թեպետ հանրահավաքների օրակարգն առայժմ հայտնի չէ, այդուհանդերձ ԲՀԿ պատգամավոր Ստեփան Մարգարյանը քառյակի նիստերից հետո նախկինում լրագրողներին ասել էր, որ դրանք կլինեն հանրությանը մտահոգող խնդիրների վերաբերյալ:
Հայ ազգային կոնգրես կուսակցության անդամները, սակայն, մեզ հետ զրույցում կարծիք հայտնեցին, որ Սերժ Սարգսյանի հրաժարականի պահանջը պետք է լինի հանրահավաքներ անցկացնելու կարևոր նախապայմաններից մեկը:
«Առաջին լրատվական»-ի հետ զրույցում «7-ի գործով» նախկին քաղբանտարկյալ, ՀԱԿ վարչության անդամ, Աբովյանի ՀԱԿ կառույցի ղեկավար Գրիգոր Ոսկերչյանն ասաց, որ կառավարության փոփոխությունը դրական և ոչ մի արդյունքի բերել չի կարող, և Հայաստանին անհրաժեշտ են համակարգային փոփոխություններ, իսկ այդ համակարգային փոփոխությունները հնարավոր են միայն ամբողջական իշխանափոխության դեպքում․«Եթե նույն Հանրապետական կուսակցությունը Սերժ Սարգսյանի գլխավորությամբ մնալու է իշխանության, նույնիսկ իրենց անկեղծ ցանկության դեպքում որևէ լուրջ փոփոխություն անել չեն կարող:
Երբ 2008-2009 թթ. բանտում էի գտնվում, այս նույն իշխանությունից ավելի մեծ հույսեր ունեի, քան այսօր, բայց տարիները ցույց տվեցին, որ այդ մարդիկ չեն կարողանում: Ես նույնիսկ չեմ խոսում այն մասին, թե ինչ շահեր ունեն. փաստը մնում է փաստ՝ այս իշխանություններն անընդունակ են դրական փոփոխություններ իրականացնել, ես նույնիսկ չեմ էլ խոսում այն մասին, թե ինչ որակներ ունեն կառավարության անդամները։ Կառավարության առանձին անդամներ կարող են շատ լավ որակներ ունենալ՝ մասնագիտական, ինտելեկտուալ, բայց դրանք հետին պլանի հարցեր են, հետևաբար պետք է դնել ամբողջական իշխանափոխության հարց»,- տեսակետ հայտնեց Ոսկերչյանը:
Նրա խոսքով՝ մեր երկրի առջև ծառացած լրջագույն խնդիրների լուծումները հնարավոր են միմիայն Սերժ Սարգսյանի գլխավորությամբ, Հանրապետական կուսակցության՝ իշխանությունից հեռանալով:
Մենք հետաքրքվեցինք, թե արդյոք նահանջ չի՞ լինի ընդդիմության կողմից, եթե դուրս գան փողոց՝ առանց Սերժ Սարգսյանի հրաժարականի պահանջի, փոխանակ կառավարության հրաժարականից հետո նախագահի հրաժարական պահանջեին:«Ես մանրամասն տեղյակ չեմ, թե ինչ օրակարգով են հանրահավաքներ հրավիրվում, բայց կարծում եմ՝ հնարավոր չէ: Եթե հանրահավաքային շարժումը սկսվեց, ապա ամբողջական իշխանափոխության խնդիրներից խուսափել հնարավոր չէ: Դահասունացած է ամբողջ հանրության մեջ, հանրությունն ինքը այդ պահանջը կդնի հանրահավաք նախաձեռնած ուժերի առջև»,-պատասխանեց մեր զրուցակիցը:
Հարցինի պատասխան, թե հույս ունի՞, որ քառյակի մաս կազմող երկու ուժերն էլ վերջիվերջո կպահանջեն Ս․Սարգսյանի հրաժարականը, Գրիգոր Ոսկերչյանն ասաց․«Գուցե դա իմ ցանկությունն է, բայց կարծում եմ, որ այլ տրամաբանական խնդիրայսօր դնել հնարավոր չէ, մնացածը երկրորդական բնույթի են և հիմնական խնդիրներից շեղող»:
Դիտարկմանըի պատասխան, թե փողոցպետք է դուրս գալ միայն Սերժ Սարգսյանի հրաժարականի պահանջո՞վ, Ոսկերչյանը ասաց․«Իմ տեսակետն այդպիսին է: Նա նույնիսկ ի վիճակի չեղավ ԵՏՄ ստեղծման պայմանագրի ստորագրման ժամանակ պատասխանել Նազարբաևին»:
ՀՀՇ նախկին անդամ և Աշտարակի տարածքային խորհրդի նախագահ, ՀԱԿ համակիր Արարատ Մորիկյանը ևս կարծում է, որ Հայաստանին անհրաժեշտ են համակարգային փոփոխություններ, և հանրահավաքներ պետք է անել հենց Սերժ Սարգսյանի հրաժարականի պահանջով:
«Ընդդիմությունը օր առաջ պետք է ոտքի կանգնի, սրանց Հայաստանից դուրս հանի»,-ասաց նա:
Հարցին, թե ինչպե՞ս է վերաբերվում այն հանգամանքին, որ քառյակի մաս կազմող ուժերից երկուսը Սերժ Սարգսյանի հրաժարականի պահանջ չեն դնում, Մորիկյանը պատասխանեց․«Ես դրան սովորական եմ նայում, որովհետև այդ ուժերը միշտ էլ նախագահի հրաժարականի պահանջ չեն դրել: Ոնց որ նախագահ Լևոն Տեր-Պետրոսյանն է ասում՝ նրանց պետք է պոկել իշխանությունից և բերել ընդդիմադիր դաշտ: Համենայնդեպս, իրենք էլհասկանում են, որ անհնար է այս կերպ շարունակել»:
Նա ընդգծեց, որ մարզերում խնդիրներն ավելի շատ են, քան Երևանում, և այնտեղ հանրության դժգոհությունը իշխող վարչակարագի հանդեպ շատ ավելի մեծ է: «Ես ողջունում եմ նրանց նախաձեռնությունը: Առայժմ ոչ մեկի հետ չենք հանդիպել,այդ մարդկանց դեմքով էլ չեմ ճանաչում՝ մյուս կուսակցություններից, բայց քննարկում, խորհրդակցություն առայժմ չի եղել: Իսկ մնացած ուժերը եթե չեն դնում Սերժ Սարգսյանի հրաժարականի պահանջ, ուրեմն կդնեն, եթե չդնեն, ուրեմն շատ կսխալվեն. ուրիշ ձև, ուրիշ ելք չկա: Նրանց բոլորին ոչ թե պետք է հեռացնել այս երկրից, այլ դատել՝ Սերժ Սարգսյան, Քոչարյան, Երվանդ Զախարյան, Մուկ կատու․․․»,- եզրափակեց Արարատ Մորիկյանը:
Լուսանկարը՝ Ժողովուրդ-ի