Մինչև 2020 թ. Հունաստանի պարտքը կարող է գերազանցել ՀՆԱ 140 % ցուցանիշը, եթե երկիրն արմատապես չփոխի ֆինանսական խնդիրները լուծելու տնտեսական և քաղաքական մոտեցումները։ Այս մասին հաղորդել է Reuters-ը` վկայակոչելով գերմանացի տնտեսագետ և Եվրոպայի կենտրոնական բանկի (ԵԿԲ) անդամ Յորգ Ասմուսենին: Նրա խոսքերով` հունական կառավարությանը դեռևս չի հաջողվում հաղթահարել պարտքային ծանրաբեռնվածության աճը:
Ասմուսենը նշել է որ ներկա պահին Հունաստանի ընդհանուր պարտքը կազմում է 175 %, իսկ մեկ տարուց այդ ցուցանիշը կարող է հասնել 190 %-ի:
Նշենք, որ նոյեմբերի 12-ին տեղի է ունենալու Եվրոխմբի հերթական հանդիպումը, որի ժամանակ հստակ որոշվելու է, թե Հունաստանն ինչ չափով է շեղվել ավելի վաղ սահմանված ցուցանիշներից:
Հիշեցնենք, որ այս շաբաթ Հունաստանը հաստատել է բյուջետային տնտեսման նոր փաթեթ, որը նախատեսում է բյուջետային ծախսերն ու հարկային արտոնությունները կրճատել 13.5 մլրդ եվրոյով:
