«Առաջին լրատվական»-ի տեղեկություններով՝ մայիսի 27-ի լույս 28-ի գիշերը` ժամը 02:55-ի սահմաններում, ղարաբաղա-ադրբեջանական հակամարտ զորքերի շփման գծի հարավային ուղղությամբ հակառակորդի կողմից իրականացված դիվերսիոն գործողությունների արդյունքում հայկական կողմն ավելի մեծ թվով վիրավորներ ունի: Կենտրոնական զինվորական հոսպիտալի մեր աղբյուրները հայտնեցին, որ վիրավորների թիվը հասնում է 9-ի:
Հոսպիտալի պետ, գնդապետ Արամ Ասատուրյանը, սակայն, «Առաջին լրատվական»-ի հետ զրույցում հերքեց, թե նման բան կա: «Իմ մոտ 4 վիրավոր կա: 3 հոգու վիճակը միջին ծանրության է, մեկ հոգունը՝ ծանր: Ոչ մեկի կյանքին վտանգ չի սպառնում»,- ասաց նա: Ասատուրյանից ճշտեցինք՝ գուցե ա՞յլ հոսպիտալում են հսպիտալացվել մյուս վիրավորները: «Ոչ»,- կարճ եղավ պատասխանը:
Ասատուրյանն անգամ 1 զոհից տեղյակ չէր: «Ես զոհերի մասին տեղյակ չեմ, ես 4 վիրավորի մասին եմ տեղյակ»,- ասաց Ասատուրյանը: