Մատակարարված գազի դիմաց Ուկրաինայի պարտքը «Գազպրոմին» ներկա դրությամբ կազմում է մոտ 4 մլրդ եվրո: Այս մասին հայտարարել է Էներգետիկայի հարցերով եվրահանձնակատար Գյունթեր Էթինգերը, հայտնում է Ria Novosti-ն: Մայիսի սկզբի համար ռուսական կողմը Կիևի պարտքը գնահատում էր 3,5 մլրդ դոլար:
Էթինգերը հավելել է, որ «Գազպրոմն» արդեն Եվրահանձնաժողովին ներկայացրել է հաշիվները, սակայն դրանցով վճարումներ չեն եղել: «Թվերն աճում են վերջին ամիսներին»,- ասել է եվրահանձնակատարը:
Գազի մատակարարման հարցով Ռուսաստանի և Ուկրաինայի միջև բանակցությունների հերթական փուլը տեղի կունենա մայիսի 30-ին: Ավելի վաղ Ուկրաինան համաձայնել էր մարել պարտքի մի մասը՝ պայմանով, որ «Գազպրոմը» նվազեցնի գինը: Իր հերթին, ռուսական կողմը պնդում է պարտքերը մարելու անհրաժեշտությունը և միայն հետո քննարկել գինը:
Մինչև 2014 թվականի ապրիլ գազի գինն Ուկրաինայի համար կազմում էր 268 դոլար 1 000 խմ-ի դիմաց: Այս գինը ստացվել էր 2010 և 2013 թթ. Կիևին երկու զեղչ տրամադրելու արդյունքում: Ավելի ուշ Ռուսաստանը չեղյալ հայտարարեց զեղչերը՝ դա հիմնավորելով վերջին մի քանի ամիսներին գազի դիմաց վճարման բացակայությամբ: Որպես հետևանք՝ գազը թանկացավ մինչև 485 դոլար 1 000 խմ-ի դիմաց:
