Սերբիան ակնկալում է ստանալ փոխհատուցում՝ 1999-ին նախկին Հարավսլավիայում 78 օր տևած ՆԱՏՕ-ի ռմբակոծությունների պատճառած վնասի դիմաց: ITAR-TASS-ի փոխանցմամբ՝ այս մասին հայտարարել է Սերբիայի նախագահ Տոմիսլավ Նիկոլիչը ՄԱԿ ԱԽ-ում:
Ռմբակոծությունների ժամանակ, որը Սերբիային ստիպեց հրաժարվել հիմնականում ալբանացիներով բնակեցված հատվածից, սպանվել է մոտ 2 հազար մարդ, վիրավորվել 7 հազարը, որից 30 տոկոսը՝ երեխաներ: Նախագահի խոսքերով՝ նախկին Հարավսլավիայի 750 հազար բնակիչներ լքել են իրենց տները և հեռացել երկրից: Վնասի վերջնական չափը հայտնի չէ, սակայն, ինչպես ասել է նախագահը, խոսքը «տասնյակ միլիարդավոր դոլարների մասին է»:
«Ես չեմ բողոքում և չեմ խնդորւմ փոխհատուցել պատերազմի դիմաց՝ դասական իմաստով: Սակայն քանի որ ես Սերբիայի նախագահն եմ, ես ձեզ հիշեցնում եմ ձեր պարտականության մասին՝ փոխհատուցելու հսկայական և անուղղելի վնասի դիմաց, որը հասցվել է մեր քաղաքացիական օբյեկտներին և տնտեսությանն առհասարակ»,- ասել է Նիկոլիչը Կոսովոյի հարցով ՄԱԿ ԱԽ-ի նիստի ժամանակ: