Ընտրություններն ավարտվում են, երբ ավարտվում է քվեարկությունը և դրան հաջորդող օրենքով սահմանված համապատասխան քայլերը: Այս մասին նշեց ՀՀ Կենտրոնական ընտրական հանձնաժողովի նախագահ Տիգրան Մուկուչյանը՝ լրագրողների խնդրանքով անդադառնալով Սյունիքի նախկին մարզպետ Սուրիկ Խաչատրյանի հայտարարությանը, թե ընտրությունները Գորիսում ավարտված են:
Մուկուչյանը նշեց, որ ընտրապայքար է ընթանում, և այն անձինք, ովքեր այս կամ այն կերպ մասնակցում են ընտրապայքարին, իրենց տեսակետներն ու կարծիքները կարող են ազատ արտահայտել: Դիտարկմանը, թե արդյոք Սուրիկ Խաչատրյանի հայտարարությամբ կասկածի տակ չի՞ դրվում ԿԸՀ գործունեությունը, Մուկուչյանը նշեց, որ այդ հայտարարությունը որևէ կերպ չի առնչվում ԿԸՀ-ին. ընդամենը ներկայացվել է կարծիք, իսկ այդ կարծիքի հետ կապված՝ ինքն անգամ հարկ չի համարում որևէ մեկնաբանություն անել:
«Կառույցը լիակատար աշխատում է օրենքին համապատասխան: Ընտրության ավարտը կարձանագրվի, երբ ընտրատարածքային ընտրական հանձնաժողովը կկայացնի համապատասխան որոշում: Սա է իրավական ելքը, մնացած կարծիքները ո՛չ կարող են անդրադառնալ, ո՛չ կարող են ազդել թե՛ քվեարկության ընթացքի, թե՛ հանձնաժողովների կողմից կայացվող որոշումների վրա»,- ասաց նա։
Լրագրողները հիշեցրին՝ ինքնաառաջադրված, ապա ինքնաբացարկ հայտնած Արա Բուդաղյանը նախապես նշել էր, որ արդեն կան ընտրակաշառքներ բաժանելու, ճնշումների դեպքեր, այս կապակցությամբ ԿԸՀ նախագահը միայն նշեց, որ յուրաքանչյուր նման դեպքում անհրաժեշտ են հստակ դիմում-բողոքներ, հակառակ դեպքում հանձնաժողովը նման հայտարարություններով անկարող է իրականացնել որևէ վարույթ, այսինքն ՝ եթե հրապարակվում է, որ կա այսինչ փաստը, գոնե պետք է ասվի՝ ում կողմից, երբ, ինչ միջոցներով, հակառակ պարագայում դրանք բոլորը դառնում են ընդամենը հայտարարություններ, որոնք զուրկ են որևէ փաստական հիմքից:
